Chapter 16
سمعت صوت دونجهى لما جيه من برا...وبدأ صوته يكون أعلى
وأوضح,كان باين من صوته انه سكران...
خرجت من أوضتى بسرعة عشان أشوف أيه اللى بيحصل...وفى اللحظة ديه شوفته بيقرب من ندى و شفايفهم أتلامست...
كنت مصدوم..معرفتش اعمل أيه فى الوقت ده..أروح أشدها من حضنه ولا
أدخل أوضتى أكنى مشوفتش حاجة...وبعد ما دونجهى باس ندى بثانية
واحدة حسيت أن روحى رجعتلى تانى لما ندى بعدت عنه بسرعة...كانت
مصدومة وصوتها مهزوز....
ندى:"بــبـيانيه دونجهى...بس فى شخص تانى فى حياتى"
كنت واقف ومش مستوعب اللى حصل قدامى دلوقتى...وفى اللحظة ديه ندى لفت وكانت داخلة أوضتها...بس وقفت أول ما شافتنى قدامها..كانت عيونى بتعاتبها...وهى كانت مصدومة,حسيت فى عيونها كلام كتير عايزة
تقوله,بس كملت طريقها لغاية الأوضة وقفلت الباب وراها من غير ما تقول
ولا كلمة....
وبعدها وجهت نظرى ناحية دونجهى..لقيته وقع على الأرض و شبه فاقد
الوعى....
كنت عايز أسيبه زى ما هو وأدخل على أوضتى..مكنتش عارف أتصرف
معاه أزاى...ندى ملكى...ملكى أنا وبس....
بس فى النهاية أتجهت ناحيته وسندته لغاية أوضته..ونميته على
السرير...كنت خارج بس صوته وقفنى...
دونجهى:"بيانيه"
سيبته وخرجت من الأوضة...كنت متجه لأوضتى بس وقفت لحظات قدام
أوضة ندى...سمعت أنينها و صوت عياطها من ورا الباب...لثوانى وقفت
أسمعها وهى بتحاول تكتم صوت عياطها...كنت بفكر أدخل وأخدها فى
حضنى وأقولها متعيطيش..أنا هنا جنبك...
بس بعدها كملت باتجاه أوضتى....
رميت نفسى على السرير وقعدت أفكر فى اللى شوفته من شوية وفى كل
المواقف اللى مرت بينا أحنا التلاتة قبل كدة...أنا ودونجهى وندى...
ياترى حبها امتى؟؟وأيه اللى خلاه يبقى فى الحالة ديه دلوقتى؟؟؟
مقدرتش انام طول الليل من كتر الأفكار اللى جت على بالى...كل اللى
عملته أنى كنت نايم على السرير وبفكر,لغاية ما الشمس طلعت.....وفى
الوقت ده سمعت صوت باب أوضة ندى بيتفتح...
قومت من أوضتى وخرجت بسرعة....بس لقيت ريم قدامى وراحت على
المطبخ...وأول ما لاحظت أنى واقف ابتسمتلى...
ريم:"صباح الخير أوبا^^"
"صباح النور...صاحية بدرى ليه؟؟"
ريم:"قولت أشرب النيسكافيه بتاعى قبل ما أنزل...مقولتلكش أنى مسافرة
تلت أيام لجزيرة جيجيو؟؟"
"بجد؟؟؟طيب أنبسطى و قضى وقت ممتع"
ريم:"امممم...بس عينك منفخين كدة ليه؟؟يعنى أنا بحاول أساعدك وأنت
مبتهتمش بنفسك خالص..أستنى خليك هنا"
دخلت أوضتها و بعد دقيقتين خرجت وفى أيدها علبة كريم للبشرة...كنت
عايز أعرف ندى صحيت ولا لأ,ياترى عرفت تنام...
وفاجأة حسيت بأيد ريم على وشى وبتدهنلى من الكريم بتاعها تحت عينى....
ريم:"الكريم ده عشان يشيل الهالات السودة"
سألتها بهدوء:"ريم...هى ندى صحيت؟؟؟"
ردت عليا وهى لسة عينها على الكريم اللى بتحطهولى:"توء توء...الصبح
لقتها نايمة على الأرض فنقلتها على السرير...بس كان شكلها معيطة
ومنمتش طول الليل_شالت أيدها من على وشى وبصتلى بجدية_فى حاجة
حصلت أمبارح بعد ما نمت؟؟؟"
معرفتش أقولها ولا لأ....كان فى ملايين الأفكار اللى بفكر فيها فى الوقت
ده...بس سؤالها صدمنى....
ريم:"اللى حصل أمبارح ليه علاقة بدونجهى أوبا؟؟؟"
"مين اللى قالك؟؟أنتى كنتى صاحية؟؟؟"
ريم:"لأ...بس توقعت,يعنى قصدى بما أنه بيحب ندى"
صدمتنى بكم الحاجات اللى تعرفها...
"وأنتى عرفتى منين أنه بيحب ندى؟؟؟"
ريم:"ديه حاجة واضحة زى الشمس...أنا هقوم أكمل لبسى عشان متأخرش"
ودخلت تانى على أوضتها وبعد ربع ساعة تقريبا خرجت وهى شايلة شنطة
على ضهرها....
ريم:"واضح ان ندى داخلة فى بيات شتوى...قوللها أنى سافرت رحلة مع
الجامعة وهرجع كمان تلت أيام عشان أنا نسيت أقولها...وخد بالك
منها....أنيوووووووو"
مشيت وسابتنى مش مستوعب اللى بتقولهولى...بجد مقلتش لأختها انها
مسافرة؟؟؟ O.o
وبعد ما خرجت دخلت الحمام أخدت شاور..وبعدها روحت على أوضتى
عشان ألبس وأنزل....
**********************************
كان عندي صداع رهيب أول ما صحيت...مش فاكر أيه اللى حصل أمبارح
ولا جيت هنا أزاى....
وبعد لحظات بدأت المشاهد تتعاد قدام عينى...من لما قابلت ريم وبعدها
روحت على الـnight club...وبعدين....ندى....
"أاايييييششش...غبى...أنت غبى دونجهى,أزاى تعمل حاجة زى ديه؟؟؟عقلك راح فين؟؟"
خرجت من أوضتى بهدوء...مكنتش عارف أتصرف أزاى..ولا هعاملها
أزاى بعد كدة...
كان كلامها بتكرر فى راسى كل شوية...مش قادر أنساه(بيانيه دونجهى..بس فى شخص تانى فى حياتى)
أنا من الأول كنت غبى..أزاى قولتلها أنى بحبها بعد ما عرفت أن هى
وشيون بيحبوا بعض؟؟؟
وفى اللحظة ديه باب أوضتها أتفتح...كانت باصة فى الأرض..وأول ما
شافتنى بصتلى وفضلت ساكتة..كأنها منتظرة منى حاجة أقولها....
"بيانيه...أمبارح أنا مكنتش فى وعيى.."
ابتسمت بهدوء....وردت عليا....
ندى:"أيه اللى حصل أمبارح؟؟أنا مش فاكرة حاجة"
حسيت براحة بعد ما سمعت كلامها...كأنه حمل وانزاح من على
قلبى....كنت عارف أنها أكيد منسيتش حاجة و بتتصنع الإبتسامة قدامى,بس
أرتحت لأنى حسيت أن علاقتنا مش هتكون باردة بعد كدة....على الأقل
هنفضل أصحاب..وفى اللحظة ديه أفتكرت ديما...لما سرقت منها قبلتها
الأولى....اااااخ دونجهى...أنت بقيت تغلط كتير.....
كان كل ده بيدور فى راسى فى الوقت اللى كنت واقف فيه قدام ندى...
ابتسمت وانا ببص للأرض..وبعدها رفعت راسى ونظرى وقف عند
شيون....
كان واقف وبيبصلنا بصدمة...وبعدها أخد مفاتيحه اللى كانت على الترابيزة
واتجه ناحية الباب..وقبل ما يخرج وقف ونظره لسة مثبت على الباب و وجه
الكلام لندى...
شيون:"ندى....ريم خرجت من شوية,وقالتلى أقولك أنها سافرت رحلة
لجيجيو وهتقعد هناك تلت أيام"
ندى:"أراسووو...كوماوااا.."
خرج شيون من غير ولا كلمة زيادة...وبعدها ندى دخلت أوضتها وأنا دخلت
المطبخ وعملتلى قهوة عشان الصداع الفظيع اللى حاسس بيه.....
وبعد شوية ندى خرجت بعد ما لبست نضارتها و أخدت الشنطة بتاعتها
ونزلت....
وانا قعدت أشرب قهوتى وأنا بفكر فى اللى مفروض أعمله من دلوقتى....
لازم أحاول أنساها..هى بتحب شخص تانى و أكيد سعادتها هتكون معاه هو
مش معايا....
يكفى أنى أكون جنبها كصديق....
مسكت موبايلى وحاولت أتصل بديما...بس موبايلها كان لسة مقفول...ياترى أيه اللى حصل؟؟؟
بدأت أقلق عليها فعلا....
************************************
فتحت عيونى ببطء...مكنتش عايزة أقوم من السرير...كنت عايزة أفضل
قاعدة هنا فى أوضتى...كنت حاسة انى هنا فى مأمن...
لكن بعد دقايق قومت من السرير بكسل و أخدت شاور وبعدها لبست
وروحت على الجامعة...بقالى يومين مروحتش وأكيد فى حاجات كتير
فاتتنى...
محدش معاه رقمى الجديد بعد ما موبايلى أتكسر وأشتريت واحد غيره...حتى ندى,مقدرتش أكلمها من وقت مقابلتى مع دونجهى...مكنش عندي الشجاعة أقابلها هى أو دونجهى....
دخلت الجامعة وكنت رايحة على السيكشن..وقبل ما أدخل شوفت لارا
وسولى واقفين بيتكلموا..وأول ما شافونى جريوا عليا....
لارا:"ديما...كنتى فين؟؟بقالك يومين مش باينة,وموبايلك مقفول."
سولى:"وكمان ندى كانت هتتجنن عشان توصللك...كانت بتكلمنا تسألنا عنك
كل ساعة تقريبا.."
رديت بهدوء:"بيانيه يا بنات لأنى قلقتكوا عليا...بس كنت مشغولة اليومين
اللى فاتوا فى شغل..وموبايلى وقع منى وأتكسر فجبت واحد جديد ومن
الشغل اتلهيت...تشومال بيانيه.."
سولى:"المهم أنك كويسة...متنسيش تكلمى ندى بعد المحاضرة..تلاقيها قلقانة عليكى أوى"
"أراسووو...خلينا ندخل عشان منتأخرش أكتر من كدة"
كان الوقت بيمر ببطء...كنت بحاول أركز فى المحاضرة..بس عقلى كان فى حتة تانية...هقابل ندى ازاى؟؟ياترى هساعد دونجهى زى ما وعدته عشان يكسب قلب صحبتى؟؟
وأخيرا مر الوقت وخرجنا...كنت ماشية مع لارا وسولى باتجاه
الكافيتريا...كانوا بيتكلموا وبيضحكوا,وأنا بكتفى أنى أبتسم على
كلامهم...وفاجاة شوفت ندى قدامى...كانت باصة فى الأرض و على وشها
علامات تعب وحزن كبير....
وأول ما رفعت راسها وشافتنى قدامها جرت باتجاهى و وقفت قدامى...كانت عينيها مليانة دموع...
ندى:"أنتى غبية...كنتى فين؟؟أنا كنت بكلمك كل شوية وبسأل عنك أى حد
يعرفك...حتى أنى روحتلك البيت أكتر من خمس مرات...وكل مرة
مبتكونيش موجودة.."
كانت منهارة من العياط وهى بتكلمنى...حسيت وقتها انى فعلا غلطت فى
حقها...
قربت منها وأخدتها فى حضنى وحاولت أخليها تهدى...
"هششش...خلاص أهدى...بيانيه...تشومال بيانيه"
كانت بتحاول توقف دموعها و هى بتتكلم...
ندى:"أنتى عارفة أنا فكرت فى أيه؟؟عارفة أنا كنت حاسة بأيه وأنا مش
عارفة أنتى فين ولا قادرة أتطمن عليكى حتى؟؟"
"بيانيه...عشان خطرى كفاية عياط"
بعدت عنى وبصتلى بعيونها اللى بتلمع مع ابتسامتها البريئة...
ندى:"غبية...بابو"
ضحكنا أحنا الأربعة من كلمات ندى والطريقة اللى قالتها بيها...وبعدها
كملنا طريقنا وقعدنا فى الكافيتريا مع بعض...
لارا:"يلا هاتى رقم تليفونك الجديد"
ندى:"أنتى غيرتيه ليه؟؟؟"
"تليفونى وقع منى واتكسر..وعشان كدة كان مقفول الفترة الاخيرة"
أخدوا هم التلاتة رقم تليفونى الجديد وقعدنا نتكلم شوية...وبعدها ندى
اعتذرت مننا و مشيت عشان عندها محاضرة وبعدها هتروح على
الشركة....واتفقنا اننا نتقابل بالليل فى الراديو وقت البرنامج بتاعى...
حسيت بالراحة وأنا بقضى الوقت معاهم..كنت ناسية وجعى وكل اللى كنت
بفكر فيه الأيام اللى فاتت....
وبعد شوية أنا كمان مشيت وروحت على الشركة..كنت بالفعل كلمت المدير
جونج عشان أعتذرله عن غيابى فى اليومين اللى فاتوا بحجة أنى عيانة....
وصلت الشركة وروحت للمدير جونج عشان أشوف الجدول بتاعى.....
وبعد ما أتفقنا على كل حاجة..روحت القاعة اللى هيكون التدريب بتاعى فيها
مع موديلز تانيين....
كنت بشتغل بكد وبحاول ألهى نفسى وتفكيرى فى الشغل...حتى التعب
مبقتش أحس بيه....
وفى بريك الغدا كلهم راحوا يتغدوا وانا قعدت لوحدى...
طلعت الأيبود بتاعى وحطيت السماعات فى ودنى وبدأت أسمع أغانى وأنا
ساندة ضهرى على الحيطة ومغمضة عينى....
وبعد لحظات حسيت بأيد بتخبط على أيدى....فتحت عينى بسرعة وأتفاجأت
أول ما شوفته قدامى..شيلت السماعات من ودنى....
دونجهى:"كدة تقلقينى عليكى اليومين اللى فاتوا؟؟كنتى فين؟؟؟معرفتش
أوصللك أنا ولا ندى"
كنت حاسة بشعور غريب..شعور السعادة ممزوجة مع الألم...حتى بعد
الكلام اللى قالهولى لسة متعلقة بيه وبحبه,للحظة كنت هنسى كل الحوار اللى دار بينا عن ندى لمجرد أنى شوفت أبتسامته...لكن بسرعة أفتكرت...
ديما..أنتى ودونجهى أصدقاء وبس..مينفعش تكونوا أكتر من كدة..
"أنا كويسة أوبا متقلقش عليا...وكمان أنا طمنت ندى عليا"
قعد وسند ضهره على الحيطة جنبى...
دونجهى:"وموبايلك مقفول ليه؟؟"
"موبايلى أتكسر..فاشتريت واحد جديد"
وفاجأة قام وسند أيده جنبى..كنت قاعدة فى وسطه وحاسة بضربات قلبى
بتزيد وتعلى...وبعد ثوانى رجع قعد جنبى تانى بعد ما أخد شنطتى..وطلع
موبايلى منها....
"بـبتعمل أيه؟؟؟"
دونجهى:"ولا حاجة...هسجل رقمك الجديد"
كان بيبص فى الموبايل ومركز أوى فى اللى بيعمله...كانت مرسومة
ابتسامة جميلة على وشه....للحظات سرحت فيه وفى ملامحه...
فوقنى صوته وهو بيرجعلى الموبايل وشنطتى...وبعدها قام وقف..
دونجهى:"أنا هرجع على التدريب بتاعى_شاورلى بالموبايل فى أيده_هبقى
أكلمك....انيووو^^"
وأنا رجعت للأغانى اللى كنت بسمعها تانى على أمل أنى مفكرش فى حاجة
تانية....
******************************
وصلت الشركة ودخلت على مكتبى على طول...رميت نضرتى وموبايلى
على المكتب وبعدها سندت راسى على أيدى وغمضت عينى وأنا بفكر فى
اللى حصل النهاردة...مقدرتش أسئل ديما أيه اللى حصل فى اليومين اللى
فاتوا بسبب ان لارا وسولى كانوا قاعدين معانا...بس لازم أسئلها لما أشوفها النهاردة بالليل...
وبعدها سمعت صوت الباب بيخبط...
"أتفضل"
دخلت السكرتيرة وفى أيدها بوكيه ورد احمر وعلبة ملفوفة بشكل راقى...
السكرتيرة:"ندى شى...الحاجات ديه وصلت لحضرتك النهاردة الصبح"
"متعرفيش مين اللى بعتها؟؟؟"
السكرتيرة:"لأ يا فندم...مفيش أسم"
"أراسووو..كوماوااا"
حطتلى الورد والهدية على المكتب وخرجت...فتحت العلبة...كان جواها
شيكولاتة...زى اليومين اللى فاتوا بالظبط..
بوكيه ورد أحمر كبير و علبة شيكولاتة ملفوفة بشكل جميل ومفيش
أسم....مفيش اختلاف غير الكلام اللى بيكون مكتوب على البطاقة...
" smile^^....بس كدة؟؟هى ديه بطاقة النهاردة؟؟؟بس...عرف منين أنى
بشتغل هنا؟؟أنا هتجنن بجد...حاسة أن فى حاجة مش مظبوطة,كل يوم نفس
البوكيه ونفس علبة الشيكولاتة"
اتنهدت بتعب...لمجرد أنى أفكر أن فى شخص بيلاحقنى وعارف البيت اللى
أنا ساكنة فيه وكمان الشركة....
وفى اللحظة ديه أفتكرت ريم وسافريتها المفاجأة...ومسكت موبايلى
وكلمتها....
ريم:"ألووو...ندى..أخيرا صحيتى؟؟أنتى نايمة من الصبح؟؟"
"لأ مش نايمة من الصبح بس كان ورايا محاضرات وشغل...أنتى فين؟؟؟"
ريم:"فى جيجيو"
"من غير ما تقوليلى؟؟؟"
ريم:"خلاص بقااااا...متزعليش,أراسووو؟؟أنا كنت هقولك بس نسيت"
"طيب...هتيجى بعد تلت أيام...صح؟؟متتأخريش وخدى بالك من نفسك"
ريم:"حاضر...باى باى...بحبك"
"وأنا كمان بحبك"
قفلت معاها وبدأت أشوف أكوام الورق اللى قدامى...
مكنش عندي أى طاقة للشغل...بس حاولت أضغط على نفسى عشان مكونش
مقصرة...وكمان الرئيس سونجو بيحاول يمسك عليا غلطة....
كنت بشتغل بهدوء..شوية على اللاب توب وشوية فى الورق اللى
قدامى...غير التليفونات اللى كل شوية بتجيلى....
قضيت ساعتين مبعملش حاجة غير أنى بشتغل...لغاية ما الباب خبط وشيون دخل....
شيون:"كنت عايز الورق بتاع نسب المبيعات اللى عندك"
كان بيكلمنى بطريقة جافة...أو ده اللى أنا حسيته...لوهلة أتصدمت من
كلامه,لكن حاولت أتمالك نفسى ومبينش أن طريقته فجأتنى...
قعدت أدور على الورق اللى هو عايزه...بس مكنتش لاقياه...
جيه و وقف جنبى وبدأنا ندور مع بعض...كنت حاسة ببعض التوتر بس
مخلتش الاحساس ده يسيطر عليا...وفى نفس الوقت مكنتش مركزة أنا بدور
على أيه ولا عايزة أيه...
كنت بفكر بس هو بيعاملنى كدة ليه؟؟؟معاملته أتجاهى أتغيرت فاجأة...ياترى ده بسبب اللى حصل أمبارح؟؟؟
وبعدين وقع نظرى على الورق اللى هو عايزه...
"هو ده...أتفضل"
أخد الورق وكان خارج من الأوضة..حط أيده على مقبض الباب وقبل ما
يفتح الباب سألنى سؤال...
شيون:"مين الشخص التانى اللى موجود فى حياتك؟؟؟"
سؤاله صدمنى...معرفتش أرد أقوله أيه!!!!أقوله أنت؟؟ولا مردش خالص؟؟؟
أصده زى ما بعمل كل مرة؟؟؟
وفاجأة هو نفسه قطع أفكارى...
شيون:"يمكن ديه حاجة متخصنيش...بيانيه"
وفتح الباب وخرج....وأنا رميت نفسى على الكرسى وكانت أنفاسى سريعة
وضربات قلبى قوية...
أيه اللى بيحصلى ده؟؟؟أيه اللى وصل حياتى لهنا؟!!!
الشخص اللى صحبتى بتحبه يبقى بيحبنى أنا...وشيون...قلبى بيقولى أنه
بيحبنى,ومش قلبى بس...كل حاجة بتبين أنه بيحبنى..بس أنا مش عارفة
أبينله...مش عارفة أخد خطوة..كل شوية بحس انى ببعد عنه أكتر
وأكتر...وديما..فى حاجة غريبة فيها...اليومين اللى فاتوا مكنتش
مظبوطة,أنا متأكدة أن حصلت حاجة كبيرة ضايقتها....ده غير الورد
والشيكولاتة اللى بيتبعتولى كل يوم ومعرفش من مين....حاسة أنى
متلخبطة ومش عارفة أفكر ومش بأيدى حاجة أعملها....
وبعد حوالى ساعة كمان...كلمت ديما و أتفقت معاها انى هقابلها فى محطة
الراديو فى وقت معاد بث البرنامج بتاعها.....
*********************************
"ااااااايششش...أختى ديه هتجننى"
كيوهيون:"ريمو حبيبتى...أنتى بتكلمى نفسك؟؟"
"لا كنت بفكر بصوت عالى بس...وأيه حكاية ريمو حبيبتى ديه؟؟؟الناس
ممكن يفهموك غلط"
كيوهيون:"طيب..خلاص خلاص..أنتى هتتعصبى عليا ولا أيه؟؟؟"
"معلش أنا مش فى المود دلوقتى"
كيوهيون:"طب أحكيلى اللى مضايقك...يمكن أقدر أساعدك"
وفعلا حسيت أنى ممكن لو حكيت لكيوهيون أرتاح شوية...بس فى الأول
أترددت عشن هو وشيون يعرفوا بعض...وكمان ندى وشيون مش قايلين لحد أنهم عايشين مع بعض فى نفس الشقة....
بس فى الأخر قررت أحكيله وأثق فيه.....
وبعد نص ساعة من الرغى والحكاوى...
كيوهيون:"الموضوع صعب فعلا...بس مفهمتش ليه قولتى لدونجهى أن ندى وشيون بيحبوا بعض!!!"
"هقولك...أنا حسيت أنه بيتعلق بندى,وكمان عنده أمل فيها...وفى نفس
الوقت ندى بتعاملوه زى أخوها أو صديقها وكمان حاسة بتشتت فى علاقتها
مع شيون...فكان لازم دونجهى يبعد..عشان هو ميتجرحش أكتر وكمان
ميأثرش على ندى بطريقة غلط"
كيوهيون:"فكرة بردوا...طب أنا هقولك حاجة,أيه رأيك تسيبى الموضوع
شوية ونشوف أيه الجديد اللى هيحصل...وفى نفس الوقت نستمتع بوقتنا
شوية..أحنا جايين نتفسح"
"عندك حق...بس عارف كيوهيون لو حد شم خبر باللى أنا قولتلهولك ده؟؟؟
هتبقى نهايتك"
كيوهيون:"عيب عليكى"
وبعدها قومنا وقعدنا نتفسح شوية ونتكلم مع بعض...كان يوم ممتع...وبجد
الجزيرة حلوة أوى والمناظر فيها تجنن....
أتصورنا كتير مع بعض..وكمان دخلنا محلات واشترينا حاجات كتير من
هناك....
كيوهيون شخص طيب..وحاسة أنى ممكن أثق فيه,وأنه هيكون صديق
كويس....
عدى الوقت بسرعة وأحنا مع بعض...وفى وقت الغروب قعدنا أحنا الأتنين
على البحر نشوف الشمس وهى بتغرق فى المية...
هههههههه...كل ما أفتكر التعبير ده أقعد أضحك...الشمس وهى بتغرق فى
المية,كنت بشوف المنظر ده كتير مع ندى وبابا وماما لما بنسافر فى
أجازة...وكنت أنا وندى بنلعب ونجرى على الشط ونغرق بعض
بالمية...منستش أبتسامة ماما وبابا فى الوقت ده وضحكهم على لعبنا و
هزارنا مع بعض....و وقت الغروب كان بابا يقولنا الشمس هتغرق فى
المية...نصها غرق أهوه...كنا نفضل متابعيها لغاية ما تختفى تماما ويظهر
الشفق الأحمر بعد الغروب..
مقدرتش أمنع أبتسامتى ولا الدموع اللى اتجمعت فى عينى لما أفتكرت
الذكريات ديه....
وفاجأة حسيت بأيده وهو بيمسك أيدى...بصتله ولسة الدموع متجمعة فى
عينى...وكانت عينه لسة متابعة منظر الغروب...
كيوهيون:"المنظر حلو أوى من هنا...صح؟؟_بعدها بصلى وابتسم_بس
معتقدتش أنه يخليكى تعيطى"
وقتها معرفتش أمسك دموعى أكتر وبدأت أعيط بصوت عالى زى
الأطفال.....
كيوهيون وهو مخضوض:"بوووووه؟؟؟؟بتعيطى ليه؟؟"
وأنا مقدرتش أوقف دموعى عشان أرد عليه..كل اللى عملته أنى قعدت أعيط
وأعيط بصوت عالى...مهتمتش أن يوكن فى حد بيبص عليا ولا أن حد يقول
عليا طفلة...أنا بس مكنتش قادرة أبطل عياط....حتى أنى ملاحظتش لهفة
كيوهيون وخضته عليا...
بس فى اللحظة ديه حسيت بأيده بتحاوطنى وبياخدنى فى حضنه وبيطبطب
عليا بحنان....
متكلمش ومقالش أى كلمة...كل اللى عمله أنه أخدنى فى حضنه جامد وأيده
بتمسح على شعرى....كان بيحاول يحسسنى بالأمان...كانت لمسة أيده
بتقولى متعيطيش,أنا جنبك....
مكنش فى داعى أنه يتكلم عشان يوصللى اللى هو عايز يقوله...
وبعد دقايق...بطلت عياط...ودموعى وقفت...
حسيت بأيد كيوهيون بتبعدنى عنه بخفة...وبص فى عيونى وعلى وشه
ابتسامة ساحرة...بس كل ده طار فى الهوا اول ما فتح بوقه وأتكلم....
كيوهيون:"متوقعتش أن ريم العظيمة تكون بتعيط زينا بالطريقة ديه"
زقيته بقوة...وقومت وقفت...
"بعتذر منك كيوهيون شى لو كنت ضايقتك"
وأديته ضهرى ومشيت...كنت بفكر,أنا أيه اللى خلانى أعيط قدامه وأيه اللى
خلانى أسمحله أنه يحضنى بالطريقة ديه...ايشششش...
وفاجأة مشى جنبى وحط أيده على كتفى....
كيوهيون:"خلاص بقا يا ريمو...أنا كنت بهزر معاكى عشان
أضحكك...متزعليش منى..ها؟؟ها؟؟"
"حم احم...طيب خلاص....تقبلته"
كيوهيون:"يلا...تحبى نروح فين دلوقتى؟؟؟"
"أنت معندكش أصحاب؟؟ليه ماشى ورايا فى كل حتة؟؟"
كيوهيون:"انتى بتهزرى؟؟؟طبعا عندي أصحاب كتير...أقولك؟؟تعالى أعرفك عليهم"
مسكنى من أيدى ومشى بخطوات سريعة و هو مجرجرنى وراه..
***********************************
من الصبح لغاية دلوقتى مفيش حاجة جديدة...بقيت أحاول أدفن نفسى فى
مذاكرتى....
بحاول أتجاهل طريقة ديما فى تعاملها معايا,بقول أنا هعمل اللى عليا...يمكن
ده يكون أحسن,ولما تشوف حبى ليها تعاملنى كأختها..
كنت قاعدة فى أوضتى بذاكر بعد ما رجعت من الجامعة....
لسة ديما مرجعتش لغاية دلوقتى...كنت حاسة بملل كبير,طول اليوم مذاكرة
وبس...
أخدت الجاكت بتاعى ونزلت أتمشى شوية...مكنتش أتغديت فدخلت محل
قريب من البيت وطلبت أكل....
وبدأت أفكر,يمكن لو كنت فضلت فى البيت كان هيبقى أحسن...دلوقتى مش
لاقية حتى شخص يشاركنى وجبتى...وفى الوقت ده جيه على بالى كيبوم
شى..قد أيه هو شخص لطيف وبيسعى لتحقيق أحلامه رغم صغر سنه...
وبعدها أفتكرت شيون..وأفتكرت أخر مرة قابلته فيها..كان قاعد فى
الكافيتريا..شوفته بعد ما خرجت من عند كيبوم....
Flash back>>>
شيون:"أوووه..مروة,بقالى مدة مشوفتكيش"
ابتسمت:"أوووه...أزيك شيون؟؟"
شيون:"نا كنتشانا..أتفضلى أقعدى"
قعدنا مع بعض وطلبنا عصير...
شيون:"أيه أخبار دراستك ومذاكرتك؟؟"
"كويسة...بحاول ألحق اللى فاتنى..وأنت قاعد هنا ليه؟؟عندك محاضرات
تانية؟؟"
شيون:"أنياااا...كنت مستنى ريم لغاية ما تخلص محاضرتها"
"ريم؟؟؟؟"
شيون:"اهااا..ريم أخت ندى الصغيرة,عارفاها صح؟؟"
"أه طبعا...بس مستنيها ليه؟؟"
شيون:"هو موضوع طويل كدة مش لازم أشغلك بيه"
ابتسمت بهدوء:"امممم"
كنا قاعدين بنشرب العصير بهدوء..لغاية ما موبايله رن....
وبعد ما المكالمة أنتهت بصلى وعلى وشه إبتسامة رائعة...
شيون:"بعتذر منك...لازم أمشى دلوقتى"
"أوووه...ولا يهمك,أنا شوية وهمشى"
شيون:"أراسووو..كان وقت لطيف اللى قعدته معاكى..أنتى معاكى رقم
موبايلى صح؟؟لو أحتجتى أى حاجة فى أى وقت أبقى أتصلى
بيا...أراسوو؟؟"
"أوووه...أراسووو^^"
Now>>>>
ابتسمت تلقائيا لما أفتكرت الوقت ده...
مسكت موبايلى وطلعت نمرته...حسيت بالتردد أنى أكلمه,بس مش عارفة
ليه فى الوقت ده حسيت أنى عايزة أشوفه وأقعد معاه...
يمكن عشان قاعدة لوحدى ومعنديش أصدقاء ممكن يسمعونى أو يقضوا
بعض الوقت معايا....
وفى النهاية استجمعت شجاعتى وطلبت رقمه...وصلنى صوت الجرس
وبعدها وصلنى صوته...حسيت بضربات قلبى بتزيد وصوت نبضاتى
بيعلى...
شيون:"يوباسيووو"
"يــيوبسيووو...شيون؟؟"
شيون:"ديه..أزيك يا مروة؟؟"
"نا كنتشانا...كوماواا..وأنت أزيك؟؟"
شيون:"كويس"
كنت بحاول أدور عن سبب لإتصالى..أو أنى أقابله...
"أنت فاضى دلوقتى؟؟"
شيون:"ليه؟؟حصل حاجة؟؟"
"أأأنياااا...بس كنت عايزة أعزمك على العشا لو ممكن!!يعنى أنت ساعدتنى
من وقت ما وصلت هنا.."
شيون:"أراسووو..نتقابل بعد ساعة كويس؟؟"
اتفاجأت من موافقته من غير ما يطرح أى سؤال..وفى نفس الوقت حسيت
بالسعادة...
"أوووه...فين؟؟؟"
واتفقنا على المكان والزمان اللى هنتقابل فيهم...
وبعد ساعة..وصلت المطعم اللى اتفقنا اننا هنتقابل فيه...دخلت,وكان هو
قاعد على ترابيزة جنب الشباك...شاورلى بابتسامة..وأنا بدلته الابتسامة
واتجهت ناحيته....
قام وقف:"أزيك يا مروة؟؟"
رديت:"أنا كويسة..شكرا على سؤالك"
قعدنا وطلبنا العشا....
شيون:"كوماوا على العزومة اللطيفة ديه..بس مكنش ليها أى داعى"
ابتسمت بخجل...معرفتش أرد أقول أيه فى الموقف ده....
شيون:"بصراحة أنا وافقت لأن مزاجى مكنش كويس من امبارح.يعنى
مكالمتك جت فى وقتها.أنا بجد كنت محتاج أغير جو"
"فى مشكلة حصلت؟؟"
شيون:"يعنى..مش مهم,أنتى كمان كان شكلك متضايق أخر مرة أتقابلنا فيها"
"بسبب المشاكل بينى وبين ديما...بحاول أتأقلم على الوضع ده"
شيون:"أووووه"
قعدنا أتعشينا مع بعض..واتكلمنا فى مواضيع مختلفة....
كان وقت ممتع...وحسيت بإنجذاب أكبر ناحية شيون....
كنت بتأمل ملامحه و هو بيضحك..أو لما يتكلم بجدية..وابتسامته...
وبدأت أفكر أنى أعجبت بيه...يمكن مش من المقابلة ديه بس...
يمكن أعجبت بشيون من أول مرة قابلته فيها فى المستشفى...كان إحساس
جميل أنى أقعد مع شخص معجبة بيه..وبنتكلم وبنقضى وقت ممتع مع
بعض....
وبعد العشا وصلنى على البيت...
شيون:"شكرا على اليوم الحلو ده...أنا فعلا كنت متضايق وحسيت انى
ارتحت شوية بعد الخروجة ديه^^"
"أنياااا...أنا كمان لازم أشكرك لأنك شاركتنى العشا..لأن فى الفترة اللى
فاتت مكنتش بلاقى شخص يشاركنى أوقاتى"
شيون:"يبقا نتفق من دلوقتى أننا نكون أصدقاء...وفى أى وقت حد فينا يحس
بالضيق يكلم التانى,فى اى وقت"
"أراسووو...أنيووو^^"
نزلت من العربية ودخلت البيت...كانت الساعة بقت 9..وديما لسة
موصلتش...طلعت أوضتى وغيرت هدومى وبعدها بدأت مذاكرة..
فرق رهيب بين احساسى دلوقتى واحساسى قبل ما أقابل شيون...
********************************
كان الهدوء هو الشئ المسيطر على طريقنا...لغاية ما بدأت كلام عشان
نتخلص من الصمت اللى كنا بنمر بيه...
"حلقة النهاردة بتاعت الراديو كانت حلوة أوى..أنا بجد فرحانة
عشانك...أنتى فاضللك خطوات قليلة على تحقيق حلمك دمدوم^^"
ديما:"أهااا...كوماوا ندوش"
"أنتى كويسة؟؟؟"
ديما:"ما أنا كويسة أهوه...ليه بتسألينى السؤال ده؟؟"
"مش عارفة...أنتى متغيرة,وكمان فى الايام اللى فاتت لما معرفتش
أوصللك...حاسة أن فى حاجة غريبة..أنتى مخبية عنى حاجة؟؟"
ديما:"أنا كويسة مش متغيرة...متخافيش عليا"
فضلت أنى أسكت لأنى حسيت بنبرة جدية وحادة فى صوتها...لأول مرة
تكلمنى بالطريقة ديه..بس قولت يمكن تكون تعبانة من الشغل أو متضايقة
من مروة زى العادة,وعشان كدة فكرت أنى أسيبها الفترة ديه من غير ما
أضغط عليها...
بس من ناحية تانية كنت بفكر..لازم ألاقى طريقة أخليها تنسى دونجهى
بالراحة,لازم تعرف أن ممكن تجربة تفشل واللى بعدها تنجح...مش عايزاها
تتأذى تانى أو تتجرح بسببى..أنا السبب فى ده كله...أنا السبب....
وأخيرا وصلنا عند بيت ديما...
ديما:"أدخلى شوية"
"مش هينفع دلوقتى..تعبانة أوى و لازم أصحى بدرى"
ديما:"أراسووو...خدى بالك من نفسك..باى باى"
"أنيوووو"
روحت على البيت وأنا بفكر فى اليوم ده...كنت بفكر هعمل أيه مع ديما؟؟
ودونجهى؟؟؟
الموضوع مش سهل..حتى لو اتظاهرنا ان مفيش حاجة حصلت...
وكمان شيون بقت طريقته غريبة...ياترى هيتغير من ناحيتى بعد اللى حصل
أمبارح؟؟؟
نزلت من العربية و طلعت على الشقة...كان دونجهى فى أوضته,واضح انه
مش نايم لأن النور مفتوح...وشيون كان قاعد قدام التليفزيون بس مش
بيتفرج عليه..كان مركز فى الورق اللى فى أيده...
اتنهدت ودخلت أوضتى...رميت شنطتى والمفاتيح على السرير ورميت
جسمى وراهم..كنت ببص للسقف وأنا بفكر فى حياتى اللى اتلخبطت
ومبقتش لاقيالها حل....
وبعد شوية غيرت هدومى وحاولت أنام وأنسى كل اللى بيحصل ده...يمكن
كدة أحسن...
صحيت على صوت المنبه...كنت تعبانة وحاسة انى منمتش ساعتين على
بعضهم...
قومت من السرير بكسل ودخلت أخدت شاور وغيرت هدومى...وقبل ما
انزل الباب خبط....
وكالعادة كان نفس بوكيه الورد وعلبة الشيكولاتة...بس النهاردة كان فى
حاجة مختلفة...كنت حاسة براحة,مفكرتش مين اللى بعتهم ولا هو عارف
عنى أيه...فكرت أنه ممكن يكون فى شخص مهتم....مهتم بيا وبيعبرلى عن
اهتمامه بالطريقة ديه...
أخدت العلبة والورد وحطتهم فى الأوضة..وقبل ما أخرج أخدت قطعة
شيكولاتة وأكلتها....
حاولت أنى أرسم أبتسامة ليوم جديد بدون مشاكل....النهاردة هيكون
أحسن....
خلصت محاضراتى بسرعة فى الجامعة و بعدها الشركة...حاولت أخلص
كل اللى ورايا بسرعة.....
وبعدها روحت لديما البيت..رنيت جرس الباب واستنيتها لغاية ما فتحتلى....
ديما بإبتسامة:"ندى...بتعملى أيه هنا؟؟مش المفروض عندك شغل
النهاردة؟؟"
رديت بإبتسامة:"خلصت اللى ورايا بدرى وجيت عشان أقضى بقيت يومى
معاكى...أحنا لسة بدرى,الساعة لسة مجتش 5..خلينا نخرج مع بعض"
ديما:"أيه رأيك نقضى اليوم هنا فى البيت؟؟أنا معنديش حيل أخرج"
تقبلت الأمر بإبتسامة:"أراسووو...زى ما تحبى"
ديما:"بس مالك؟؟أيه اللى حصل؟؟شكلك مبسوطة...ياترى فى جديد؟؟"
ومن هنا بدأت أحاول أنى أبينلها ان مش مجرد شخص هو اللى هيخلينا نأثر
على حياتنا عشانه...
"تعرفى يا دمدوم؟؟بيقولوا ان الحب مش ممكن تنسيه الا بحب جديد..أيه
رأيك؟؟تفتكرى ممكن أنسى شيون لو حبيت حد تانى؟؟"
رسمت ابتسامة هادية على شفايفها:"أنا عارفة مين الحد التانى اللى ممكن
يكون مناسب ليكى"
رديت بحماس..حسيت أنها ممكن تتقبل انها تبعد عن دونجهى...
"مين؟؟؟ J"
بس كانت إجابتها أكبر صدمة ليا....
ديما:"دونجهى"
...
..
......يتبع.....
ليست هناك تعليقات:
إرسال تعليق