Love and Fate Brings us together(الحب و القدر يجمعنا), chapter 31 & final (part 2)

Chapter 31

part 2

كنت فى حالة صدمة لما شوفتها..كانت وحشانى,لكن مقدرتش أقولها ده...

فى النهاية هى اللى سابتنى وسافرت..تعبت من كتر ما بقيت أحاول امنعها

من الهروب...طول الفترة اللى فاتت كنت بسأل نفسى ليه عملت كدة؟!!

الوحيدة اللى قدرت تحسسنى بالألم..والوحيدة اللى دموعى نزلت

عشانها,,وبعد ما سافرت إصرار ماما زاد على يونا..وقتها فكرت لو

مكنتش هى مش هتفرق أى واحدة غيرها..وده اللى خلانى أخطب يونا...

خبطت على الباب وريم فتحتلى..دخلت وقعدت معاها هى وكيوهيون

شوية...مقعدتش معاهم لفترة طويلة,,أستنيت كيوهيون لغاية ما جهز

وخرجنا مع بعض عشان الاجتماع اللى فى الشركة...

أتوجهت لهناك وأنا رايح على مكتبى شوفتها قاعدة فى مكتبها ومعاها

شخص تانى..لثوانى وقفت وعينى مركزة عليهم..

أفتكرت شوفته فين..كان هو نفس الشخص اللى رقص مع ندى وقت ما كنا

فى مصر..ابتسمت لما افتكرت كلامها عنه وقتها...

(رامى،الشريك الجديد فى شركتنا,,ده يبقا الشخص اللى أنقذ كل حاجة)

"هو ده يبقا خطيبها!!"

اتنهدت واتجهت لمكتبى..قعدت وسندت راسى على ضهر الكرسى..وبعد

دقايق الباب خبط ويونا دخلت...

يونا:"أوباا..الإجتماع هيبدأ دلوقتى.."

قومت من على الكرسى وحطيت أيدى فى جيبى وكنت خارج,,قربت منى

وشبكت دراعها فى دراعى وخرجنا مع بعض...

شوفت ندى ورامى واقفين مع كيوهيون عند بابا غرفة الاجتماعات...

عيوننا اتلاقوا لثوانى قبل ما تلف وشها بعيد وتدخل الأوضة ومن بعدها

رامى...

دخلنا وبدأ الاجتماع..مكنتش قادر أركز بدرجة كبيرة..سامع المناقشات

عن الحسابات وأرباح السنة ونسب الشراكة وعقود جديدة عشان

تتمضى,بس أنا مكنتش مهتم بده كله..

من وقت للتانى كنت ببص عليها..أزاى ممكن تكون قاسية للدرجادى؟!!

خلص الإجتماع وخرجنا كلنا..وفى الوقت ده سمعت صوت بابا بينده لندى

وطلبها فى مكتبه على إنفراد...

كان عندى فضول كبير أعرف هو عايزها فى ايه...

**************************************

دخلت ورا السيد تشوى المكتب..كنت مستغربة لأنه طلبنى على إنفراد...

السيد تشوى:"أتفضلى أقعدى ندى شى.."

قعدت وبصتله باهتمام وانا مستنياه يتكلم...

السيد تشوى:"تشربى أيه؟!!"

"مفيش داعى شكرا.."

السيد تشوى:"أكيد مستغربة عشان طلبت نتكلم على انفراد.."

"نوعا ما.."

السيد تشوى:"أنا وعمك اتكلمنا من فترة على موضوع الشراكة اللى ما

بينا,وقدمتله إقتراح جديد..وهو إن نسبة شراكتنا معاكوا تبقا النص.."

اتفاجأت أول ما سمعت النسبة ديه..

"النص؟!!"

السيد تشوى:"شركتكوا من أكبر الشركات فى الشرق الأوسط..كمان

عندكوا فروع فى بلدان مختلفة..وكان الإقتراح إنشاء فرع جديد فى كوريا

يكون تحت إدارتنا..ونسبة الشراكة تبقا النص.."

"بصراحة عمى مجبليش سيرة عن الموضوع ده خالص.."

السيد تشوى:"أنا طلبت منه ده,لأنى كنت عايز أقولك بنفسى...أنا هكلمك

بصراحة,الشركة ديه أنا اللى بنيتها,طبعا بمساعدة الرئيس سونجو..وانا

طول الفترة اللى فاتت وأنا بحاول أحافظ على الشركة ديه وأكبرها

كمان...وأكيد بفصل حياتى الشخصية عن الشغل,ولاحظت إن أنتى كمان

بتعملى كدة,واحترمت فيكى ده...لكن الرئيس سونجو مبيعملش كدة..هو

بيستخدم سلطته فى الشركة عشان يحصل على اللى هو عايزه..وخصوصا

إن نسبته مش قليلة.."

رديت:"فهمت.."

السيد تشوى:"دلوقتى أيه رأيك فى الإقتراح؟!!"

"الكلام ده المفروض يتعرض على رئاسة مجلس الإدارة بالكامل مش أنا

لوحدى..وزى ما حضرتك عارف دلوقتى أنا مسئولة عن 30% بس.."

السيد تشوى:"عارف..لكن أنتى ليكى سلطة على85% من الشركة مش 30

بس.."

"مش فاهمة قصد حضرتك بالظبط.."

السيد تشوى:"اقصد نصيب أختك,لو أنتى وافقتى هى هتوافق..وكمان عمك

قال إن الموضوع كله فى أيدك..إنتى اللى هتقررى بخصوص نصيبه

كمان.."

سكت شوية وانا بفكر فى الكلام اللى سمعته..ليه بيحطوا المسئولية ديه

كلها عليا؟!!

"أنا مش هقدر أرد على حضرتك دلوقتى..عايزة وقت أفكر وكمان اناقش

الموضوع مع عمى,,لكن بالنسبالى لو القرار فعلا فى أيدى..أنا

موافقة..لكن مش النص.."

السيد تشوى:"أنا توقعت حاجة زى ديه..على العموم خدى وقتك فى

التفكير.."

قومت وخرجت من مكتبه..واتجهت لمكتبى,قعدت على الكرسى وغمضت

عينى وأنا بفكر...

Flash back>>>

شيون:"كنتى تقصدى بأيه لما قولتى إنك وعدتى باباكى بإنك تحققى حلمك

الخاص؟!!أيه هو حلمك؟!!"

بصتله بابتسامة:"كنت عايزة أبقى home designer ..لكن بعد حادثة بابا

وماما مبقاش قدامى حل غير إنى أهتم بالشركة – سكت شوية وبعدين

بصتله بابتسامة – وانت مكنش عندك حلم خاص؟؟من وانت صغير وانت

بتحلم انك تدير شركة باباك؟!!"

شيون:"من وأنا صغير مكنش عندى الفرصة إنى أفكر فى حاجة تانية.."

Now>>>

فوقت من افكارى على صوت الباب بيخبط بعدين اتفتح..فتحت عينى

وانا متوقعة يكون رامى لكن كان أخر شخص متوقعة يجى يكلمنى...

يونا:"مشغولة؟!!"

اتنهدت وبصتلها بقلة صبر..حسيت بكره كبير فى قلبى...

"فى حاجة؟!!"

يونا:"اه..فى حاجة لازم تاخدى بالك منها – رفعت أيدها قدام وشها –

شايفة الخاتم ده؟؟أنا وشيون اتخطبنا.."

بصتله ببرود:"وده يخصنى فى أيه؟!!"

يونا:"قولت لازم تعرفى,إن فرحنا بعد إسبوعين من النهاردة – قربت منى

خطوتين – عشان كدة متحاوليش تقربى منه.."

ضحكت بسخرية وقومت وقفت وانا بصالها:"إنتى عايزة أيه تانى

يونا؟؟مش خلاص؟؟أخدتى اللى أنتى عايزاه وفزتى بيه؟!! – ابتسمتلها –

واضح ان معندكيش ثقة فى إنه هيفضل معاكى بعد رجوعى.."

نظراتها تحول لغضب واضح...

كملت كلامى:"يا إما معندكيش الثقة الكافية فى نفسك.."

يونا:"أنا حذرتك.."

خرجت من المكتب وقفلت الباب وراها..وأنا رجعت قعدت تانى على

الكرسى بقلة صبر...

*****************************************

كنت قاعد فى مكتبى وأنا حاسس بالحيرة..ليه بابا طلب يقابلها

لوحدهم؟؟هيقولها أيه؟!!!

بعد دقايق يونا دخلت وقفلت الباب..قعدت قدامى على المكتب وعلى وشها

ابتسامة..

يونا:"أوباا يلا عشان نخرج.."

"هنروح فين؟!!"

يونا:"معرفتش عن سهرة النهاردة؟؟فى حفلة عندنا فى البيت بمناسبة

العقود الجديدة..خلينا نروح عشان نلحق نجهز.."

"أوووه..أراسوو.."

وصلت يونا على بيتها وبعدين روحت على البيت..جهزت نفسى وروحت

فى المعاد..شوفت ندى ورامى جايين مع بعض...

كان الجو ممل بشكل كبير..وده اللى خلانى أوافق على اقتراح يونا اننا

نكمل السهرة فى night club لكن إتفاجأت لما عرفت إن ندى ورامى

هيجوا معانا....

"ليه هيجوا معانا؟!!"

يونا:"بالصدفة كنت واقفة بتكلم مع رامى شى وقولتله على السهرة..وقال

انه هيجى هو وندى.."

كنت عارف إن يونا ليها أيد فى اللى حصل..بس مهتمتش كتير..

استنيت يونا لغاية ما غيرت هدومها بهدوم تناسب المكان اللى رايحينه

وسبقنا رامى وندى على هناك...

وصلوا بعد نص ساعة وقعدنا مع بعض احنا الأربعة..لاحظت اللى كانت

لابساه..بنطلون ضيق باللون الأسود,وفوقيه بلوزة مفتوحة لأول صدرها..

كنت حاسس بالغضب والعصبية..أزاى بيسمحلها تخرج بالهدوم ديه؟!!

طلبنا المشروبات اللى احنا عايزيينها....

رامى:"أنا هاخد تيكيلا..وندى عصير..وأنتوا؟!!"

يونا:"أنا هاخد زيك.."

بصيت فى عنيها وأنا بقولها:"وأنا عصير.."

طلبنا المشروبات وبعدين قعدنا نتكلم...

رامى:"أنت كمان مبتشربش شيون؟!!"

رديت:"كنت بشرب,بس وعدت شخص إنى مشربش تانى.."

بصيت عليها عشان اشوف ردة فعلها..كانت بصة فى الأرض ومش

بتتكلم..وبعد ثوانى قامت وقفت..

ندى:"هعمل تليفون وراجعة.."

خرجت وفضلنا احنا التلاتة قاعدين..وبعد دقيقتين أنا كمان استئذنت

وقومت...خرجت وشوفتها واقفة برا لوحدها..كانت مديالى ضهرها...

اتكلمت بهدوء:"ليه؟!!"

بصتلى بملامح متفاجأة من وجودى هنا...

"ليه سافرتى وسبتينى؟!!"

ندى:"ده موضوع وعدى خلاص.."

كانت هتدخل لكن مسكتها وخليتها تقف أدامى...

"لو كان موضوع وعدى بالنسبالك فهو مش كدة بالنسبالى.."

كانت بصة للأرض من غير ما ترد عليا...

"مبسوطة معاه؟!!قادرة تكونى معاه زى ما كنتى معايا؟؟بيحبك بنفس القدر

اللى كنت بحبك بيه؟!!"

بصتلى بعيون مدمعة:"شيون...كفاية.."

"قدرتى تنسينى؟!! – كنت حاسس بالدموع بتتجمع فى عينى..ابتسمت بألم

وسيبت أيدها – أنا مقدرتش..حاولت أنساكى,حتى إنى كنت كل يوم بفكر

فى الجرح اللى سببتهولى عشان أكرهك...لكن معرفتش.."

بصتلى فى نفس الوقت اللى بدأت دموعها تنزل فيه على وشها....

ندى:"يونا ورامى مستنيين جوا..خلينا ندخل.."

مسكت أيدها قبل ما تتحرك:"يونا ورامى..أيه رأيك ننساهم,لو حتى

لثوانى.."

بصتلى وهزت راسها:"مش هينفع.."

"مش هينفع لثوانى؟؟طب للأبد – سكت شوية وبعدين كملت – انا اتمسكت

بيكى أكتر من مرة..ومش هقدر أعمل كدة أكتر,مش هقدر أطلب منك

تكونى جنبى تانى..مينفعش المرادى أنتى تتمسكى بيا؟؟"

كنت مستنيها ترد..لكن بصت للأرض وبدأت تعيط أكتر...

كملت كلامى:"أطلبى منى أسيبها عشانك..أطلبى منى مرة واحدة بس إنى

أفضل معاكى وأنا هعمل كدة,لمرة واحدة بس.."

بصتلى..كانت نظراتها متعلقة بعنيا...

وفى الوقت ده سمعت صوته من جنبنا...كرهته أوى فى الوقت ده..

رامى:"ندى.."

قرب منها بسرعة لما شافها بتعيط..حط أيده على وشها وبدأ يمسحلها

دموعها...

شوفت نظراتها لسة مركزة عليا..وأنا بصتلها بعتاب..حسيت

بالألم..الكره..الضعف..كل المشاعر ديه أتولدت جوايا فى اللحظة اللى

شوفته بيلمسها فيها..

كنت عايز أمنعه..لكن بصفتى أيه؟!!

*****************************************

كنت حاسة إن روحى بتتسحب منى..وألمى زاد لما دموعه نزلت عشانى..

للحظات كنت حاسة إنى هضعف وهرمى نفسى فى حضنه وأقوله

متسبنيش..كان عقلى بيقوللى معملش كدة,لكن كل حاجة فيا مكنتش

مطاوعة عقلى...

وفى الوقت ده سمعت صوت رامى من جنبنا...قرب منى وبدأ يمسحلى

دموعى...

شوفت نظرات شيون ليا..كنت آخر حاجة بتمناها إن رامى يلمسنى قدامه..

رامى:"مالك؟؟أيه اللى حصل؟؟ - بص لشيون – شيون..فى أيه؟!!"      

مسكت أيده ونزلتها من على وشى:"أنا بس تعبانة شوية..عايزة أمشى.."

رامى:"خليكى هنا..هجيب الجاكت بتاعك من جوا ونمشى.."

فضلت واقفة فى مكانى وهو واقف قدامى فى مكانه...بعد ثوانى رجع

رامى ولبسنى الجاكت...ركبت جنبه فى العربية واتجهنا ناحية الأوتيل..

كنت بحاول أمنع دموعى من إنها تنزل مرة تانية قدامه...وفى الوقت ده

فاجأنى بسؤاله...

رامى:"شيون كان الشخص اللى أنتى بتحبيه؟!!"

بصتله باستغراب...

ابتسم وبصلى وبعدين رجع يبص على الطريق...

رامى:"كلامى صح.."

ندى:"رامى.."

رامى:"أنتى مش مجبرة تقولى أى حاجة..متبرريش.."

وصلنا على الأوتيل..طلعت على أوضتى وقعدت على السرير,كانت

دموعى كل شوية تنزل وامسحها..وأخيرا نمت من غير ما أحس بنفسى...

***************************************

عديت على يونا الصبح فى البيت وروحنا الشركة مع بعض...

يونا:"أيه اللى حصل أمبارح؟!!"

"أيه اللى حصل؟؟"

يونا:"أصدى إن ندى ورامى مشيوا فاجأة.."

رديت ببرود:"معرفش.."

كنت عارف إنها عارفة إنى خرجت عشان اتكلم مع ندى..لكن كنت عارف

بردوا إنها مش هتتكلم فى الموضوع ده...

وصلنا الشركة ودخلنا مع بعض..كانت شابكة دراعها فى دراعى زى

العادة...وقبل ما نوصل على مكاتبنا شوفنا رامى قدامنا....

يونا بابتسامة:"رامى..أزيك؟؟"

رامى:"أنا كويس..وأنتوا؟!!"

بصيت الناحية التانية من غير ما ارد..

يونا:"وأحنا كويسيين..صحيح ندى فين؟؟امبارح مشيت من غير ما

اشوفها,,حصل حاجة؟!!"

رامى:"هى بس كانت تعبانة شوية..والنهاردة معرفش راحت فين,فى

الريسبشن قالولى إنها خرجت من بدرى,وقافلة موبايلها.."

يونا:"أوووه..فهمت,,صحيح..أمبارح نسيت خالص

ومبركتلكوش..مبروك.."

كنت عارف هى بتعمل كدة ليه..بتحاول تفهمنى إن مفيش أمل أرجع

لندى..بتثبتلى إن هى بقت الوحيدة دلوقتى فى حياتى وانى بقيت ملكها...

رامى:"مش فاهم..مبروك على أيه؟!!"

يونا:"على خطوبتك أنت وندى.."

ابتسم ورد عليها:"أنتى أكيد فاهمة غلط..أنا وندى مش مخطوبين.."

بصتله بصدمة لما سمعت اللى قاله...وقتها بس لاحظت انه مش لابس

خاتم فى أيده...

يونا باحراج:"بس الخاتم اللى فى أيد ندى.."

رامى:"ندى مبتقلعش الخاتم ده من أديها – ابتسم – بصراحة منكرش إنى

حبيتها..واتقدمتلها,لكن هى رفضت..وإتفقنا إننا نكون أصدقاء وبس.."

أول ما سمعت كلامه سيبت أيد يونا وخرجت من الشركة بخطوات

سريعة..ركبت عربيتى وكلمت ريم عشان اعرف لو كانت تعرف مكان

ندى..لكن مكنتش عارفة عنها حاجة..حتى دونغهى وديما ميعرفوش

مكانها...

دورت عليها فى كل مكان..روحت على الشقة لكن بردوا مكنتش هناك...

دخل الوقت على المغرب وموبايلى مكنش بيبطل رن..كانت يونا,لكن أنا

تجاهلت كل الاتصالات وفضلت أدور عليها...

وفى الأخر عرفت هى هتكون فين...مفيش مكان غيره هتروحه وهى

متضايقة....

**************************************

روحت من الصبح وقعدت عند النهر..كنت قاعدة على الشط وانا بفكر..

ولأول مرة قعدت أشرب,,كنت بحاول انى ألهى  نفسى بأى حاجة..مش

عايزة أفتكر كل اللى فات...

قلعت الخاتم من أيدى وحطيته على رجلى وبقيت أبصله...

وقتها افتكرت أخر يوم شوفته فيه..بعد ما قولتله إنى هسيبه وهسافر...

Flash Back>>>

معرفتش أمسك نفسى أكتر..صوت عياطى بقى أعلى بمجرد خروجه من

البيت...كنت حاسة بقلبى وجعنى,,وبقيت ألوم نفسى...

يعنى لا أنا عرفت أسيبه ولا أنا عرفت أكسبه..قعدت على ركبتى على

الأرض وسندت براسى على الكنبة وانا بعيط..

بعد ثوانى بقيت أحاول أهدى نفسى,رفعت وشى وشوفت علبة صغيرة

على الكنبة...مسكتها وفتحتها و وقتها أنهرت من العياط...

كانت خواتم...كان هيطلب يتجوزنى فى الوقت اللى أنا طلبت منه ننفصل..

أخدت العلبتين ورجعت على البيت,كانوا ريم وكيوهيون نايميين..بقيت ألم

هدومى وحاجتى فى الشنط وأنا بحاول مفكرش فى أى حاجة...بس مكنتش

قادرة أمنع دموعى من النزول...

وعلى الساعة 6 الصبح أتجهت للمطار...

طلعت العلبة من شنطتى ولبست الخاتم بتاعى...

"وعدتك إنى مش هكون لحد غيرك..بتمنى تفضل فاكر وعدى ليك.."

***************************************

وصلت عند النهر وشوفتها قاعدة هناك على الرمل...قربت منها وبصتلها

وهى قاعدة,,كان قدامها 5 أزايز مشروب...

"أنتى من أمتى بتشربى؟!!"

بصتلى وبعدين ضحكت بسخرية ورجعت تبص على الأزايز اللى

قدامها...

ندى:"أاايييشش..يعنى انا جايبة المشروب عشان انساه,,ودلوقتى بقيت

اتخيله كمان.."

كان واضح من صوتها انها سكرانة....

قعدت جنبها وبصتلها بلوم....

"ليه كدبتى عليا..ليه قولتيلى إنك اتخطبتى؟!!"

بصتلى بعيون مدمعة:"ليه نسيت؟؟"

"أنا منستش..أنا ممكن أنسى أى حاجة فى الدنيا ديه إلا أنتى.."

بصت على الخاتم اللى محطوط على رجليها...

"نسيت ده..نسيت إنى وعدتك إنى مش هكون لحد غيرك.."

نزلت دموعها على وشها...قربت أيدى منها عشان أمسحها لكن هى بعدت

عنى بسرعة..

استغربت من بعدها بالطريقة ديه...

ندى:"متحاولش تلمسنى..حتى لو كان وجودك هنا مجرد خيال,بلاش تخليه

يختفى لما محسش بلمسة أيدك.."

نزلت أيدى لما هى بصت قدامها وعلى وشها ابتسامة خفيفة...

"ليه سيبتينى؟!!أيه السبب فى اللى حصل ده كله؟!!"

بصتلى:"السبب إنه – مكملتش كلام وضربت نفسها على راسها – اايشش

ندى إنتى غبية – حطت صوباعها على شفايفها وبصتلى – هششش..ده

سر,مينفعش حد يعرفه...حتى إنى ماقولتهوش بصوت عالى ولا مرة,حتى

لنفسى.."

فضلت بصصلها وانا مش عارف المفروض اعمل أيه...

سمعت صوتها ضعيف وهى بتتكلم....

ندى:"سيبها.."

"قولتى أيه؟!!"

بصتلى بعيون مدمعة:"مش قولتلى لو قولتلك سيبها عشانى هتعمل

كدة؟؟وأنا بقولك دلوقتى سيبها عشانى,,متبقاش لواحدة تانية غيرى –

سكتت لدقيقة وبعدين بدأت تضحك بهستيريا – هههههههههههههه أنا بجد

أتجننت – كانت بتتحرك بدون توازن لغاية ما راسها وقعت على كتفى –

بحبك.."

اخدت الخاتم من على رجليها ولبستهولها...

قومت من مكانى وشيلتها ومشيت بيها لغاية العربية...حطيتها فى كرسيها

وبعدين قعدت مكانى,بصتلها وشيلت شعرها من على عنيها...

"وأنا أوعدك مش هكون لحد غيرك.."

شغلت العربية وروحت الشقة بتاعتنا..من وقت طويل مجتش هنا,لكن كنت

ببعت حد ينضفها...

دخلت بيها أوضتها وحطيتها على السرير..قلعتها الجاكت بتاعها بعدين

نمت جنبها وأنا حاطت أيدى تحت راسى وببص عليها..كنت بتأمل

ملامحها,,وحشتنى كل تفاصيلها..

****************************************

صحيت وأنا عندى صداع فظيع...مسكت راسى وقومت ببطء وقعدت

أبص حواليا...بس أيه اللى جابنى هنا؟؟أيه اللى حصل؟!!

اتصدمت لما شوفت شيون نايم جنبى..وقتها افتكرت شوية حاجات من اللى

حصلت أمبارح...

أد أيه أنا غبية...

قومت بسرعة قبل ما يصحى ولبست الجاكت بتاعى  ونزلت...

كنت بمشى وانا بحاول افتكر كل اللى حصل امبارح...لكن مكنتش عارفة

افتكر غير حاجات بسيطة...عرف إنى متخطبتش..كمان إنى لسة

بحبه...بس أكتر حاجة كانت مريحانى انى فاكرة ومتأكدة إنى مقولتلوش

عن سبب سفرى من هنا...

سمعت موبايلى بيرن..أخدته من جيب الجاكت ورديت...

"ألو..دمدوووم.."

ديما:"فينك يا هانم؟!!مش هتخلينا نشوفك ولا أيه؟؟"

"أنتى بتهزرى؟؟أنتى فين دلوقتى؟!!"

ديما:"أنا وأوبا فى الشركة دلوقتى,هنروح على كافيه قريب من المكان بعد

شوية.."

"خلاص..أنا هغير هدومى وهقابلكوا هناك.."

قفلت معاهم واخدت تاكسى لغاية النهر مكان ماكنت قاعدة امبارح..وزى

ماتوقعت عربيتى كانت لسة هناك...

اتجهت للأوتيل عشان أغير هدومى وأروح أقابل ديما ودونغهى....

***************************************

صحيت وملقتهاش جنبى..قعدت أدور عليها فى الشقة كلها بس مكنتش

موجودة...

كلمت ريم,وقالتلى إنها عرفت ان ندى رايحة تشوف ديما ودونغهى...  

روحت على البيت فى الأول عشان أغير هدومى قبل ما اروح أشوفها..

روحت على أوضتى وغيرت هدومى..وقبل ما اخرج سمعت صوت بابا

وماما بيتكلموا فى أوضة المكتب..مهتمتش باللى كانوا بيقولوه وكنت هخرج..بس فى الوقت ده صوت ماما بقا اعلى وسمعت اللى هى

قالته...

السيدة تشوى:"يعنى بعد كل اللى عملته عشان أخليها تبعد عنه..جاى

دلوقتى ترجعها؟؟وقبل فرح ابنك باسبوعين؟!!"

قربت من المكتب اكتر وبقا صوتهم أوضح...

السيد تشوى:"بس فهمينى أزاى قدرتى تكدبى على ندى بالطريقة ديه

وتقوللها انك تعبانة عشان تسيبه,,إنتى مش عارفة الموت ده بالنسبالها

أيه؟!!"

السيدة تشوى:"وانت مش عارف أبنى يبقا بالنسبالى ايه؟!!"

السيد تشوى:"إنتى بس بعدتيها عشان خايفة تبعده عنك..بعد ما ساب البيت

وراح عاش لوحده..وبعدين ظهرت ندى اللى من بلد مختلفة تماما ولقتيه

بيحبها,,خوفتى يبعد عنك أكتر..بس أنتى مشوفتيش حالة إبنك كانت عاملة

أزاى الفترة اللى فاتت؟؟لمدة سبع شهور مشوفتهوش ولا مرة بيضحك.."

السيدة تشوى:"هينسى,وهيكمل حياته..و فيها أيه لما أكون بحب أبنى ومش

عايزاه يبعد؟؟..وبعدين أنت دلوقتى مهتم بسعادته؟؟فين الاهتمام ده لما كنت

بتغصبه على حاجات هو مش عايزها.."

السيد تشوى:"كل ده كان عشان مصلحته.."

السيدة تشوى:"وأنا عملت كدة عشان مصلحته.."

وقفت أدام الأوضة وبصتلهم هم الاتنين...

السيدة تشوى:"شيون؟؟حبيبى انت فاهم غلط.."

"فاهم أيه غلط أوماا؟؟إنك كدبتى على البنت اللى بحبها عشان تسيبنى؟؟"

السيدة تشوى:"ده كان عشان مصلحتك..أنا عملت كدة عشانك.."

"أوماا..أنتى مفكرتيش فى مصلحتى – بصتلهم هم الاتنين – محدش فيكوا

فكر فى مصلحتى..ديه بس كانت الحجة اللى بتتعاملوا معايا بيها.."

قربت منى بخطوات بطيئة:"شيون.."

"عايزة تقولى أيه تانى أوماا؟؟"

سكتت شوية وبعدين بصتلى:"أنت ممكن متفهمش اللى انا عملته ده,,بس

انت مهم بالنسبالى..أنا مش عايزاك تغلط وتعييش باقى عمرك ندمان.."

"أزاى هندم لما اتجوز البنت اللى حبيتها واخترتها؟!!"

السيدة تشوى:"أنت عمرك ما كملت حاجة اخترتها للنهاية..مش

فاكر؟؟دروس البيانو؟؟والرسم؟؟وحتى بعد ما كبرت ودخلت الكلية.."

"أنتى بتقارنى ده كله بالبنت اللى اخترتها شريكة حياتى؟!!"

السيد تشوى:"شيون أهدى شوية وحاول تفهم.."

"أنا دلوقتى فهمت بما فيه الكفاية..كل اللى حصل إنى الفترة اللى فاتت ديه

كلها كنت عايش فى كدبة كبيرة.."

كنت هخرج من المكتب,بس وقفت واتلفت لماما...

"صحيح أوماا...دروس البيانوا والرسم,أنتى اللى اخترتيهملى مش انا.."

خرجت من البيت وركبت عربيتى..كلمت دونغهى وعرفت هم هيتقابلوا

فين,وروحت على هناك...

*************************************

كنا قاعدين احنا التلاتة مع بعض وبنتكلم...ندى كانت قاعدة وبتبصلنا

بابتسامة...

"فى أيه؟؟بتبصيلنا كدة ليه؟!!"

ندى:"شكلك أنتى وأوبا متغير..حاسة فيكوا حاجة غريبة.."

دونغهى:"طب متغير للأحلى ولا الأسوء.."

سندت ضهرها على الكرسى وربعت أديها...

ندى:"لا حلوين.."

فى الوقت ده جم تلت بنات وطلبوا توقيعى أنا ودونغهى....

دونغهى:"أسمكوا أيه؟!!"

...:"أنا رى هان.."

دونغهى:"واااه..أسمك حلو أووى.."

بصتله أنا وندى بابتسامة بسبب تصرفاته..

البنات اخدوا توقيعاتنا وبعدين بصولنا بابتسامة:"أنتوا صحيح

بتتواعدوا؟!!"

خبيت وشى بأيدى:"أيييششش.."

وراح دونغهى حاطت أيده على كتفى....

دونغهى:"أيه رأيكوا؟؟لايقيين على بعض؟!!"

أتكلمت أنا وندى فى وقت واحد:"أوباااااا..."

بصلنا وضحك...

بصيت للبنات:"أنيااا..أحنا مش بنتواعد..بس أنا ودونغهى أوبا نعرف

بعض من قبل ما ندخل الوسط الفنى.."

البنات:"أوووه..فايتنج أوباا..فايتنج أوونى.."

ردينا عليهم:"فايتنج.."

مشيوا وقعدت أنا ودونغهى وندى نكمل كلامنا...

ندى:"أوبا..أنت فعلا طلعت مش قليل – بصتله بابتسامة – لو كنت بدأت

فى مواعدتك,كنت دلوقتى هبقا حبيبة أهم الفنانيين فى كوريا.."

قعدنا نضحك بعد كلام ندى..بالفعل حصلت أحداث كتير بعدتنا عن

بعض,وبعدين قربتنا تانى أكتر من الأول...

مشاعرى اتجاه دونغهى مبقتش زى الأول,لكن بردوا مش هقدر أنكر إنى

بكون مبسوط لما بيقول إنى حبيبته..حتى لو كان على سبيل الهزار..

مبقتش أحس بحساسية أو إحراج لما الموضوع يتفتح تانى دلوقتى..كل ده

كان من الماضى وعدى...ومحدش عارف المستقبل لسة مخبيلنا أيه....

بعد شوية شيون وصل..دخل وسلم علينا وقعد جنب ندى بابتسامة,,كان

واضح على وش ندى التوتر...

خبطت دونغهى بخفة على دراعه..وقومنا وقفنا احنا الاتنيين...

دونغهى:"احم..أه,,أحنا هنقعد على الترابيزة اللى جنبكوا ديه.."

ضربته على راسه...

دونغهى:"يااااا..."

شديته:"يلااا.."

قعدنا على الترابيزة اللى جنبهم..كنا شايفينهم وسامعين اللى هم بيقولوه

كمان بشكل كويس..

دونغهى:"ضربتينى ليييه؟؟؟"

"هششش..خلينا نسمع بيقولوا أيه.."

دونغهى:"صحيح إنك..حشرية.."

بصتله بطرف عينى وبعدين رجعت ابص على ندى وشيون...

حاولت ندى تقوم لكن شيون مسكها وقعدها تانى مكانها..كانت بتحاول

تهرب بنظرها منه...

ندى:"سيبنى أقوم.."

شيون:"لأ.."

ندى:"شيون..أحنا.."

شيون:"انفصلنا؟؟مش هنرجع لبعض؟!!اممم..حاجة كمان؟؟"

ندى:"أنت بتعمل كدة ليه؟؟أنت خلاص فرحك بعد أسبوعين..و.."

شيون:"أنتى نسيتى ولا أيه؟!!"

ندى:"نسيت أيه؟؟"

شيون:"أنا وعدتك..أنا مش هكون لواحدة غيرك.."

ندى:"أنا مش هينفع أكون معاك شيون.."

شيون:"عشان ماما؟؟؟"

ملامحها ظهر عليها الصدمة...

شيون:"أنا عرفت كل حاجة.."

ندى:"عرفت أيه؟!!"

شيون:"عرفت سبتينى ليه..وعرفت ماما قالتلك أيه.."

سكتت ومردتش عليه,وهو كمل كلامه..

شيون:"كل اللى ماما قالتهولك مش حقيقى..هى مش عيانة,ومش هيجرالها

حاجة..هى عملت كدة بس عشان نسيب بعض.."

بدأت الدموع تتجمع فى عنيها..قرب منها وأخدها فى حضنه...

شيون:"مقولتليش ليه؟؟مكنش ده كله هيحصل.."

ندى:"كنت عايزنى أقولك أيه؟؟أقولك شيون أحنا لازم نسيب بعض عشان

مامتك هتموت وأنت لازم تبقا جنبها؟؟ولا أقولك خلينا نبعد عن بعض لغاية

ما مامتك تموت وبعدين ممكن نبقا نتجوز بعد كدة؟!!"

بدأت تعيط وهو بس بيمسح على شعرها بحنان...

شيون:"خلاص متعيطيش.."

ندى:"يعنى أنا سيبتك كل الفترة اللى فاتت ديه من غير أى سبب.."

قعد يهديها لغاية ما بطلت عياط وبعدت عنه شوية...

بص على أديها:"أنتى مش لابسة الخاتم ليه؟!!"

أخد شنطتها منها وفتحها وقعد يدور فيها لغاية ما طلع علبة واخد منها

خاتم..مسك أيدها عشان يلبسهولها لكن هى شدت أيدها منه...

شيون بقلة صبر:"فى أيه دلوقتى؟!!"

ندى:"أنت ليه أنانى كدة؟؟ليه عايزنى ألبس خاتم مكتوب عليه اسمك وأنت

لابس خاتم مكتوب عليه اسم واحدة تانية؟!!"

حط الخاتم فى العلبة وقفلها..

شيون:"عندك حق.."    

قرب منها وباسها على خدها وقام بعد ما حط العلبة فى جيبه...

شاورلنا وبعدين مشى..

قومت انا ودونغهى بسرعة وقعدنا مع ندى...

ندى:"تفتكروا ممكن.."

دونغهى:"لازم متسيبيهوش..أنتوا الاتنين لسة بتحبوا بعض.."

ندى:"بس هو دلوقتى عنده خطيبته.."

"وهى ديه مشكلة؟؟"

*************************************

جت ندى وجابت شنطتها عشان تقعد معايا أنا وكيوهيون فى البيت...

كان واضح إن تفكيرها بقا مشغول دايما..عايزة تسأل عن شيون لكن بتمنع

نفسها,خصوصا وإنها مشفتهوش أو كلمته لمدة يومين...متعرفش هو

هيعمل أيه؟؟هيتخلى عن فرحه وأهله وخطيبته عشانها؟؟

لكن اللى مكنتش تعرفه إن أنا وديما وشيون كان عندنا تخطيطات بشأنهم..

بعد يومين أخدناها أنا وديما وروحنا نعمل شوبنج..كانت بتسألنا عن

السبب,لكن كان جوابنا لمجرد التسلية...

كل واحدة فينا أشترت فستان..أنا وديما اخترنالها فستان أبيض قصير

واصرينا انها تجيبه بالرغم من انها كانت عايزة تشترى الأسود...

بعدين روحنا صالون تجميل وصففنا شعرنا...وأخيرا روحنا البيت ولبسنا

الفساتين اللى اشتريناها وخرجنا...

طول السكة وندى كانت بتسأل على المكان اللى هنروحه بس أحنا قولنالها

إنها مجرد خروجة...

وصلنا عند النهر..ونزلنا من العربية..ابتسمت أنا وديما لما شوفنا اللى

شيون مجهزه...

كان المكان رائع قدام البحر..الأقمشة باللون الأبيض,والورد باللونين

الأبيض والأحمر..

ندى كانت واقفة ومش فاهمة حاجة..فى الوقت ده سمعنا صوت من

ورانا..

...:"أنا هاخدها من هنا.."

ابتسمت أنا وديما وسبقناهم..روحت وقفت جنب كيوهيون,وديما وقفت

جنب دونغهى...أما شيون كان واقف وباين إنه مش قادر يصبر أكتر من

كدة...

بعد دقايق جت ندى وهى شابكة دراعها فى دراع عمى...بصتلنا واحد

واحد..أنا وديما..دونغهى..ميرو..كيوهيون..أيونهيوك,و والد شيون...

وفى النهاية وقفت أدام شيون وبصتله...

عمى سابها و وقف جنبى...

وشيون  مسك أديها الاتنين...

شيون:"مفيش الفرح الكبير اللى بتحلمى بيه..ولا المعازيم الكتير..ولا حتى

الفستان الأبيض الطويل ولا الطرحة,,فى بس أنا وأنتى...ودلوقتى – طلع

علبة من جيبه وفتحها – تقبلى تتجوزينى؟!!"

وقفت من غير ما تتكلم..كانت بتبصله هى والعلبة اللى فى أيده من غير ما

ترد...

"يلا وافقى..أكيد مش عايزة تبقى خالة وأنتى لسة متجوزتيش حتى.."

فى الوقت ده كلهم بصولى بنظرات استفهام..وكيوهيون مسك أيدى..

كيوهيون:"أنتى حامل؟!!"   

هزيت راسى بأه...

كيوهيون:"وأزاى متقوليليش؟!!"

ديما ودونغهى:"مبروووك ريمووو.."

"احم احم..طب مش نخلينا فى اللى احنا فيه دلوقتى؟!!

كلنا سكتنا وبصينا على ندى وشيون تانى..كانوا هم الأتنين حاضنيين

بعض ومبتسميين...

"عجبكوا كدة؟؟فاتتنا أهم لحظة.."

ضحكوا كلهم بسبب كلامى...

وبعد الغروب كانوا خلصوا عهود الزواج وخلاص بقوا متجوزين بشكل

رسمى....

*************************************

كنا حاضنيين بعض وبنرقص على موسيقى هادية..إحنا الاتنيين مش

لابسين حاجة فى رجلينا...

كنت حاسة إنى طايرة فوق السحاب وأنا معاه...

بعدت عنه شوية وسألته بقلق...

"بس يونا؟؟؟"

شيون:"كل ده مش لازم تفكرى فيه تانى..المهم دلوقتى اننا مع بعض.."

"بس.."

وقبل ما انطق بأى كلمة زيادة خطف شفايفى بين شفايفه فى قبلة قوية

وعميقة,نسيت الدنيا كلها فى اللحظة ديه وأنا بين أديه...

وبعد ثوانى بعد عنى شوية,وقتها سمعت صوت صفير من حوالينا..دفنت

وشى فى صدره بإحراج لما لاحظت إنهم شافونا..وكنت سامعة صوت

ضحكته...

ضربته على صدره:"بتضحك على أيييه؟!!"

شيون:"مكسوفة ليه دلوقتى..انتى خلاص بقيتى مراتى رسمى.."

"ولو..بردوا مش قدامهم.."

خلصنا السهرة و روحنا على الشقة..وقفنا أدام باب العمارة سوا..وقبل ما

نخطى أى خطوة لجوا فاجأنى بإنه شالنى وبدأ يطلع لغاية شقتنا...

"هتطلع لغاية الدور ال12 وانت شايلنى؟!!"

شيون:"أنتى مستقلية بجوزك ولا أيه؟!!"

فى الوقت ده حسيت بسعادة وخجل لما قال (جوزك)...

طلعنا لغاية فوق..وزى ما قاللى قبل كدة,شالنى لغاية ما وقفنا قدام

أوضتى...

نزلنى على الأرض وفتح الباب..وقتها حسيت بالدهشة لما شوفت عفش

الأوضة كله متغير,,كان رائع فعلا...

شيون:"عجبتك؟!!"

بصتله وابتسمت وانا بهز راسى بموافقتى...

شالنى تانى ودخلنا الأوضة وحطنى على السرير..كنت حاسة بتوتر

وكسوف كبير..

قرب منى وطبع قبلة على جبينى..ومن بعدها على طرف أنفى..وأخيرا

قبلة خفيفة على شفايفى..وبعدين بعد عنى شوية وأخدنى فى حضنه...

شيون:"بحبك..ومن اللحظة ديه إياك تفكرى تانى مجرد تفكير إنك ممكن

تهربى منى أو تبعدى عنى.."

ــــــــــــــــــــــــــــــــــــ

تانى يوم الصبح فتحت عينى بالراحة وشوفته واقف قدام التسريحة بيظبط

هدومه...قومت قعدت وسندت براسى على رجلى...

بصلى بابتسامة من خلال المراية...

شيون:"صباح الخير.."

"صباح النور..رايح فين على الصبح كدة؟!!"

قرب منى وقعد جنبى..حط أيده على وشى وباسنى على خدى..

شيون:"بابا كلمنى...ماما عرفت إننا اتجوزنا امبارح,وطبعا متضايقة

جدا..هروح أشوفها وبعدين أجى.."

حاولت اقوم من السرير وانا بكلمه:"طب استنى هاجى معاك.."

مسك أيدى ورجعنى مكانى...

شيون:"لأ..خلينى أهتم انا بالموضوع ده.."

"مش المفروض دلوقتى نعمل كل حاجة مع بعض؟؟نساعد بعض ونتحمل

مشاكلنا سوا؟؟"

شيون:"صح..بس مساعدتك ليا بإنك تكونى جنبى ومتسبنيش,,دلوقتى أنا

راجل البيت وأنا اللى لازم اتحمل مسئولية ده كله – ابتسملى –

متخافيش..يلا باى.."

"طب مش هتفطر حتى؟!!"

شيون:"مش هتأخر..هاجى بسرعة عشان نفطر مع بعض.."

نزل..وأنا قومت من السرير,أخدت شاور و وقفت أحضر الفطار لغاية ما

يجى,,كنت حاسة بإحساس حلو..الإطمئنان والحب والسعادة..حتى إنى

مش مصدقة إن كل ده حصل بالسرعة ديه..بفتكر إنى فى حلم وممكن

أصحى منه فى أى لحظة...

بعد شوية ريم وديما كلمونى..قعدنا نتكلم أحنا التلاتة مع بعض لوقت

طويل,,ديما قفلت فى الأول لأن كان عندها تدريب,,وبعدين قفلت مع ريم

لما سمعت صوت الباب...

شيون:"حبيبتى..تعالى,جبتلك مفاجأة.."

خرجت وانا مستنية أشوف أيه المفاجأة ديه..بس أول ما شوفت اللى فى

أيده صرخت ودخلت الأوضة بسرعة وقفلت على نفسى الباب...

**************************************

روحت على قاعة التمرينات وبدأت التمرينات بتاعتى...وبعد شوية المدير

دخل...وقفت الموسيقى وانحنتله...

المدير:"أيه أخبارك ديما شى؟!!"

"أنا كويسة.."

المدير:"أكيد أنتى عارفة عن الإشاعات اللى  طلعت عنك إنتى ودونغهى

من السوبر جونيور.."

"دييه..سمعت عنها.."

المدير:"فى الحقيقة رغم انى عارف إن ملهاش أى أساس من الصحة إلا

انى مكنتش موافق عليها..لكن لقيت ردة فعل الفان مختلفة.."

"ديييه؟؟؟؟"

المدير:"أنتى ودونغهى من أكتر الكوبلز المحبوب فى كوريا.."

ضحكت بخفة بسبب الكلام ده..

"بس زى ما حضرتك قولت الكلام ده ملهوش أى أساس من الصحة...أنا

ودونغهى مجرد أصدقاء.."

المدير:"عارف..وعشان كدة عارف إنك مش هتمانعى إنكوا تشتغلوا مع

بعض"

"نشتغل مع بعض؟!!"

فى الوقت ده الباب أتفتح ودونغهى دخل بابتسامة..

المدير:"أنتوا الأتنين هتشتغلوا مع بعض على أغنية جديدة هتقدموها فى

حفلة الشركة الجاية..مفيش وقت طويل,عشان كدة بتمنى تستغلوا الوقت

كويس.."

خلص المدير كلامه وخرج من الأوضة...

"هههه...شينشا..المدير غريب جدا.."

قرب منى وضربنى بخفة على راسى..

دونغهى:"أيه؟؟مش عاجبك إنك هتشتغلى معايا ولا أيه؟!!"

مسكت خدوده جامد:"وأنا أقدر بردوا أعترررررض.."

دونغهى:"آآآآآى..سيبيييينى...بتوجعى.."

وقفنا احنا الاتنين نضحك مع بعض ونتفق على اللى لازم نعمله...

"صحيح..حبيبتك مش هتعارض؟!!"

دونغهى:"بردوا مش عايزة تصدقى إنى أنفصلت عنها؟!!"

"هههههههه...متاخدش كلامى.."

دونغهى:"أنتى اللى متاخديش كلامى.."

بحب صداقتنا ديه..يمكن لو كنا كملنا مع بعض كأحباء مكناش هنبقا على

وفاق زى دلوقتى...على الرغم من إنى كتير لما بفكر فى اللى حصل قبل

كدة بندم إنى أتخليت عنه كحبيبى....

دلوقتى..معرفش إيه اللى هيحصل فى المستقبل..نصيبى هيكون معاه ولا

مع غيره..

بس اللى أنا عارفاه إنى عايزة أعيش مبسوطة..مش عايزة أخسر حد تانى

من حياتى..

لأن السعادة مش من السهل نلاقيها..ولما نلاقيها مش لازم أبدا نتخلى

عنها...

**************************************

ديما..هى صديقتى المفضلة بكل بساطة,,أحيانا بحس إنها لسة بتحبنى...

لمعة عيونها لما بتكلمنى متغيرتش..إبتسامتها ونصايحها..و وقفتها جنبى..

كل ده بيعلقنى بيها أكتر...أحيانا بفكر إنى ممكن أقع فى حبها بسبب

معاملتها ليا...

لكن لغاية دلوقتى قلبى موقعش فى حب حد غير ندى..كانت أول واحدة

حبيتها,,وأول واحدة قلبى انجرح بسببها...

بيقولوا إن مش من السهل تنسى الحب إلا بحب جديد...

لكن أنا نسيت حب ندى بصداقة ديما وإهتمامها..

وعشان كدة أنا بقول إن مش من السهل تنسى الحب إلا بإهتمام الصداقة

مش بالسهولة ديه..لكن ممكن

****************************************

 كيبوم:"كدة الدعاوى كمان خلصت.."

"تفتكر مامتك وباباك هيحبونى؟!!"

حط أيده على خدى:"ومين ممكن ميحبش القمر بتاعى؟!!"

اتفقنا إن فرحنا هيكون خلال شهرين..جهزنا كل حاجة..من أول البيت

لغاية الدعاوى....

كنت مبسوطة وأنا بخطط لحياتى معاه بالطريقة ديه..حتى إن حبى لكيبوم

خلانى أحس إن حبى لشيون كان مجرد وهم...

حياتى بقت أحلى من وقت مارجعت لكوريا مع ديما..حاسة إن كل حاجة

بقت فى وضعها الصحيح...

علاقتى بماما وبابا اتحسنت نوعا ما..وبقيت اكلمهم من وقت للتانى..

دلوقتى حصلت على الإهتمام اللى كنت مفتقداه..والحب اللى كنت بحلم

بيه...

وبقيت لما بفكر فى اللى فات بعرف إن الإهتمام أهم حاجة فى الحياة...

مش كل الناس بيكونوا محظوظين وبيلاقوا الحب..لكن فى المقابل ممكن

يلاقوا الإهتمام اللى هينسيهم كل حاجة هم مفتقدينها

****************************************

"أوبااااااااا..نفسى فى المشمش.."

كيوهيون:"ريم حبيبتى..ده مش الموسم بتاعه أجبهولك منين؟!!"

"معرفش أتصرف.."

كيوهيون:"حاااضر..هحاول.."

قرب منى وباسنى على خدى...

كيوهيون:"أنا هروح دلوقتى على الشغل..خدى بالك من نفسك ومتنسيش

أجهزى لغاية ما أرجع عشان نروح نقعد عند ماما اليومين دول.."

"أراسووو..انيووو.."

كنت مبسوطة باهتمامه الزايد بيا..خصوصا بعد ماعرف عن حملى..اتفق

معايا إننا نقعد فى بيت أهله لغاية ما أولد...وأنا ممنعتش...

فى الفترة اللى فاتت بقيت أقلل أسئلتى ليه..كنت فين؟؟واتأخرت ليه؟؟

مش هنكر إنى لسة بغير عليه بجنون..لكن بحاول أتحكم فى نفسى عشان

ميحسش بالملل منى...

فى النهاية الغيرة بتدل على الحب والإهتمام..لكن لما بتزيد عن حد معين

بتدل على قلة الثقة وبتصيب الإنسان بالزهق والخنقة

************************************

قعدت أخبط على الباب عشان تفتح...

"ندااااا...أفتحى الباب بقا.."

ندى:"لأ..خرجها الأول.."

"قولتلك حطيتها فى أوضتى وقفلت عليها الباب.."

ندى:"لأ...مليش دعوة,خرجها من الشقة كلها.."

"طب أطلعى بعدين نتفاهم.."

ندى:"لأاااااا...مين قالك تجيب قطة معاك؟؟هى ديه المفاجأة اللى كنت

بتقول عليها؟!! – بدأ صوتها يعلى – أنت مش عارف إنى بكرههم وبخاف

منهم.."

بقيت أحاول أزق الباب عشان أفتحه..وهى بتزق عشان تقفله..

"أفتحى.."

ندى:"أنيااااااااااااا.."

فتحت الباب بقوة ودخلت..كانت عيونها مدمعة و وشها أحمر وخلاص

هتعيط...

وقفت أدامها وحطيت أيدى على وشها...

"أنتى هتعيطى بسبب قطة؟!!"

ندى:"مشيها.."

"أنتى مش بتثقى فيا؟!!"

ندى:"مش بثق فيها هى.."

ضحكت بسبب كلامها:"هههههههه..طب جربى مرة واحدة.."

هزت راسها بلأ..

"أوعدك..همسكها ومش هخليها تقرب منك إلا لما تطلبى.."

ندى:"مش هطلب.."

"طب شوفيها بس من بعيد.."

مسكت أيدها وخرجتها من الأوضة وقعدتها على الكنبة..بعدين روحت

على الأوضة التانية وفتحت الباب وشلت القطة من على الأرض...كانت

صغيرة أوى..فى حجم كف الأيد,و بردوا ندى كانت خايفة منها....

وشوية شوية أتعودت عليها..كنت مبسوط عشان حاولت تواجه خوفها

عشانى...

وفى الأخر اتعودت عليها وبقت تشيلها كمان....

"نسميها أيه بقا؟!!"

ندى:"سوشى.."

"سوشى؟!!"

بصتلى بابتسامة:"اممم...لايق عليها..صحيح,,عملت أيه مع مامتك؟!!"

ابتسمتلها:"كل حاجة مع الوقت هترجع زى الأول وأحسن.."

***************************************

بقالنا متجوزين دلوقتى خمس شهور....

كنا قاعدين بنتغدا مع بعض لما جالى تليفون من كيوهيون...

كيوهيون:"نداااااااا...ألحقينى.."

"فى أيه كيوهيون؟؟أيه اللى حصل؟!!"

كيوهيون:"ريم بتولد.."

"أيه؟؟بس لسة معاد ولادتها مش دلوقتى.."

كيوهيون:"أنا هاخدها على المستشفى دلوقتى...عاااااااااا.."

"طيب إحنا جايين دلوقتى.."

بصيت لشيون:"يلا بسرعة خلينا ننزل..ريم بتولد.."

لبسنا احنا الاتنين بسرعة و وصلنا على المستشفى..

كانت ريم داخلة أوضة العمليات وماسكة فى أيد كيوهيون وقاعدة تعض

فيه...

ريم:"عاااااااااا....أنت السبب.."

كيوهيون:"ريم حبيبتى أهدى..شهيق زفير..شهيق زفير.."

ريم:"أخرصصصصصص..متعصبنيييش كفاية أبنك.."

كنت مصدومة من اللى بيحصل قدامى...وأخيرا ريم دخلت أوضة

العمليات وفضلت أنا وشيون واقفين برا مع كيوهيون...

كان قى أثار حمرا مكان ضوافر وأسنان ريم على أيده ودراعه...

قربت من شيون وحضنته...

"أوباا...أنا مش عايزة ولاد.."

شيون ضمنى لصدره:"وأنا كنت هقولك نفس الكلام.."

وأخيرا ريم ولدت وجابت ولد زى القمر...كان شكله صغنن و كيوت

أوى..

بس معرفش وقتها ريم كانت بتفكر أزاى..من غيظها فى كيوهيون كانت

عايزة تسمى أبنها جعفر...

 بس فى النهاية اتفقوا انهم يسموه (آسر) لأن ريم صممت يكون أول ولد

ليهم إسمه عربى...

بعد شهرين عرفت إنى حامل...كنت خايفة جدا,خصوصا وإنى شوفت ريم

كانت بتتألم أزاى وقت ولادتها..لكن شيون كان جنبى وبيحاول ينسينى كل

ده بإنه يفكرنى بالسعادة اللى هنحصل عليها لما نكون عليتنا الصغيرة...

كنت قاعدة فى الصالة وحواليا ورق الشغل وببص فيه...

جيه شيون وقعد جنبى وحط كوباية لبن قدامى...

شيون:"يلا سيبى اللى فى أيدك ده..كفاية كدة.."

"أستنى شوية بس أوباا.."

أخد الورق اللى كان فى أيدى وشالنى ودخلنى الأوضة..

شيون:"لو أنتى مش هتهتمى بصحتك على الأقل اهتمى بصحة بنتى.."

بصتله بطرف عينى:"أنت من دلوقتى هتعاملنى كدة عشانها؟؟وبعدين مين

قالك إنها هتكون بنت؟؟أنا عايزاه ولد..وسيبنى بقا,,فى شغل لازم يخلص

النهاردة وكمان انا مش عايزة أنام دلوقتى.."

شيون:"اااييييششش..مش هتبطلى العند ده؟!!"

خرج من الأوضة وجاب كوباية اللبن وبعدين أدهانى عشان أشربها....

على الرغم من إنه بيحب يعمل اللى فى راسه ويعند معايا..كمان تحكمه

اللى بقا يزيد يوم بعد يوم...إلا إنى بقيت أعشقه أكتر...

اتعلمت أزاى أحافظ على حبى...و أواجه المشاكل اللى بتقابلنى مش أهرب

منها وبس..

 الهروب هيزود المشاكل..هيخلى الفجوة تكبر..وبردوا المشاكل مش

هتنتهى

السعادة هى شعور..بيكون سببه الناس اللى حواليك..حبهم واهتمامهم بيك

أو ممكن يكون سببه حلم وصلتله..أو حتى فكرة خطرت على بالك..

فى النهاية السعادة هى الغاية القصوى اللى كل إنسان بيسعى ليها

ومع ذلك لا يوجد طريق مختصر للسعادة

The End

By:Nada Hatem

9/5/2014 18:02pm

شكر خاص ل البت أونى Douniazed

و ميرو حبى Park Angel

وأختى حبيبتى Reem Hatem

وطبعا بشكر كل اللى تابعونى لوقت طوييييل واستحملونى وشجعونى لغاية ماخلصت تانى قصة ليا....

كان أول بارت نزل بتاريخ 28/1/2013

وآخر بارت بتاريخ 9/5/2014

يعنى بالظبط سنة وأربع شهور...

كوماووااا...سارانيييه <3 <3 :*

ملحوظة للهانم Nada Waleed سوشى الغالى هيشتهر على أيدى يا غالية...

بتمنى من الكل إنهم يقولولى رأيهم..ياترى القصة عجبتكوا؟؟ولا؟!! J