Chapter
12
أيه اللى جابهم هنا؟؟وأيه اللى عرفهم على بعض أصلا..مروة
يا دوب وصلت أمبارح...بصيت على ندى,مكنتش مصدومة زيى..أكنها عارفة انهم عارفين
بعض...بس كان شكلها متضايق,أكيد أتضايقت لما شافت شيون مع بنت تانية...وفى الوقت
ده سمعت دونجهى....
دونجهى:"أووووه...شيون,بتعمل أيه هنا؟؟"
شيون:"أنتوا اللى بتعملوا أيه هنا؟؟؟"
حاولت أتفادى الحوار..كنت حاسة ان الموقف مش مريح بالنسبالى أنا و ندى..بسبب مروة و شيون....
دونجهى:"عادى..كنا متفقين نتقابل النهاردة أنا و ديما و ندى"
ندى:"مروة أزيك؟؟كنت عايزة نتكلم أمبارح بس مجتش فرصة...عايزين
نتقابل قريب"
بصيت لندى بإستغراب...بتحاول تعمل أيه؟؟؟
مروة:"أكيد..لازم هنتقابل و نقعد مع بعض"
دونجهى:"أيه ده؟؟أنتوا تعرفوا بعض؟!!"
رديت:"أها أكيد...مروة كانت جارتنا فى مصر وهى حاليا ساكنة معايا
لفترة..لغاية ما تلاقى مكان تانى تنقل فيه"
مروة:"جارتك؟؟؟فعلا...كلام ديما مظبوط..احنا كنا ساكنين جنب بعض
بالظبط...تقريبا فى نفس الشقة..تقدر تقول أننا أخوات"
حسيت انها بتحاول تستفزنى بالكلام ده..كانت علامات الاستفهام واضحة على وش دونجهى..بصيت لندى كان شكلها هى كمان
متضايق جدا بسبب شيون...لاحظت ان هم الاتنين بيتبادلوا النظرات من تحت لتحت...كأن كل واحد فيهم بيحاول يوصل رسالة
للتانى....
ندى:"أنا هدور العربية...يلا عشان منتأخرش"
مشيت و أنا كمان مشيت وراها:"عندك حق...مش يلا أوبا؟؟؟"
دونجهى:"أها..أنيو شيون هشوفك بعدين...سعيد أنى أتعرفت عليكى يا
مروة"
ركبنا أحنا التلاتة العربية و كنا فى طريقنا للسوبر ماركت...و وقتها دونجهى فتح الموضوع تانى....
دونجهى:"ممكن تفهمونى بالظبط أيه الموضوع؟؟!!أنا مفهمتش حاجة!!!"
ندى:"مروة تبقى أخت ديما يا أوبا"
بصيت لندى..كنت عايزاها تسكت و متكملش...
ندى:"متبصليش كدة...مش هى ديه الحقيقة؟؟؟"
فضلت انى أسكت عشان متحصلش مناقشة فى الموضوع ده أدام دونجهى....
دونجهى:"طب وعرفت شيون أزاى و أمتى؟؟؟"
ندى:"صدفة...هو موضوع طويل بس الملخص يعنى ان حصلت حادثة
بسيطة بينهم و موبايل مروة وقع فى عربية شيون..بس"
كانت بتتكلم بلا مبالاة زيادة...كانت بصة قدامها وبتتكلم بهدوء,,حسيت بصوتها المخنوق....طب بدام بتحبه للدرجة ديه ليه بتهرب
منه؟؟؟؟؟اااااخ منك يا ندى....
وصلنا السوبر ماركت...
كانت ندى ماشية بهدوء و مش بتتكلم على غير العادة...كانت ماشية ورانا..وأنا و دونجهى كنا ماشيين جنب بعض و بنشوف الحاجات
اللى هنشتريها,كنت مبسوطة أنى معاهم هم الأتنين,,أعتقد أن ندى و دونجهى هم بجد أهم أتنين فى حياتى دلوقتى..وفاجأة قرب منى و
همس فى ودنى...
دونجهى:"ندى مالها؟؟؟كانت متحمسة واحنا فى الكافيه و دلوقتى مش بتتكلم
خالص"
معرفتش فى الوقت ده أقوله على شيون ولا لأ,بس فضلت أنى متدخلش فى خصوصيات ندى...لو هى عايزة تحكى هتحكى من
نفسها....
***************************************
وصلنا السوبر ماركت...كان كل أفكارى بتتمحور حول شيون
أنا مش فهماه..يونا و بعدين مروة؟؟طب و أنا؟!!يعنى أنا بالنسباله زى البنات اللى يعرفها بجد؟؟
وفجأة ديما قربت منى و خبطتنى على كتفى...أتخضيت من الحركة ديه خصوصا و أنى كنت متعمقة فى التفكير....كانت
بتبتسملى...عندها حق,أحنا خارجين عشان نغير جو مش عشان نزعل نفسنا....وأنت يا شيون أنا عارفة هتصرف معاك أزاى...
دونجهى:"أنتى تعبانة ولا حاجة؟!!"
رديت:"لأ أنا كويسة....خلونا نجيب الحاجات بسرعة عشان نلحق نجهزها
لما نروح...وأكيد طبعا عارفين أيه أهم حاجة فى الرحلات..صح؟؟؟؟"
بصوا لبعض هما الاتنين و بعدين بصولى تانى....
"مش ممكن...بجد مش عارفين!!!!!"
ديما:"أعتقد أنى عارفة...بس نفسى أطلع غلطانة"
دونجهى:"أيه هى أهم حاجة؟!!!"
رديت بإبتسامة:"الحلويات طبعا"
ديما:"يا ريتك ما قولتى..أنتى عايزة تقهرينى؟؟؟أنا منعت نفسى عن
الشيكولاتة بالعافية وتأقلمت على كدة..وأنتى هتيجى دلوقتى تبوظيلى كل
حاجة عملتها فى السنين اللى فاتت"
"أوووووووه ديما الرشيقة...أحب أعتذر منك بس للأسف مينفعش نروح
فسحة من غير الحلويات"
دونجهى قعد يضحك علينا و هو بيبصلنا احنا الاتنين.....
دونجهى:"ههههههه....خلاص يا ديما..متاكليش منها"
ديما بوش حزين:"مش هقدر أمنع نفسى"
"متخافيش أنا همنعك"
مشيت قدامهم وأنا بضحك بسعادة...ديما و دونجهى هم أكتر أتنين هيساعدونى لغاية ما ريم تيجى..أنا متأكدة من كدة.....
مشيوا و رايا و كان صوتهم مسموع بالنسبالى.....
دونجهى:"طب كلى منها قليل...واضح ان الطفلة اللى قدامنا ديه مش
هتتنازل"
ديما:"أكيد مش هتتنازل..وأنا خايفة لو أكلت منها تجيلى أنتكاسة و أرجع
زى الأول...وبعدين أنتوا فاكرين انى أكون عارضة ديه حاجة سهلة"
بصتلهم و طلعت لسانى لديما:"ديه ضريبة النجاح يا حبيبتى"
ورجعت بصيت أدامى تانى...وأنا سامعة صوت ضحكهم من ورايا
و أخيرا بعد ساعتين من اللف والبحث و الشراء...كنا أشترينا كل الحاجات اللى أحنا عايزنها و راجعين على البيت......
ديما:"أحنا هنروح فين دلوقتى؟؟؟؟"
"على البيت...عشان نجهز الكيمباب اللى هناخده بكرة معانا"
دونجهى:"بس إنا جت فى بالى فكرة دلوقتى...معرفش كنت ناسيها ليه!!!أحنا
ليه هنعمل ده كله؟؟ما أحنا ممكن ناكل فى أى مطعم برا"
"عارفة...بس أنا عايزة نعمل أحنا الأكل"
سكتنا بعد كدة لغاية ما وصلنا البيت..كان شيون لسة مجاش,وقفنا فى المطبخ و بدأنا نشتغل مع بعض...كنا بنضحك و بنتكلم...كان
وقت حلو قضيناه مع بعض.......
**************************************
مروة:"بس أنت أيه علاقتك بديما وندى؟!!"
شيون:"ديه حكاية طويلة...بس أنا علاقتى مع ديما مش مقربة أوى..لكن أنا
و ندى قريبين من بعض"
مروة:"أهاااااا"
قعدنا شوية وشربنا عصير و قعدنا أتكلمنا مع بعض...بجد طلعت بنت لطيفة أوى......
مروة:"أنا أسفة بس لازم أمشى دلوقتى...ورايا مذاكرة كتير"
"أوكى...هوصلك"
مروة:"مفيش داعى...البيت قريب من هنا"
"أنتى فى طريقى أصلا...يلا بينا"
وصلتها لحد البيت...بصراحة كان فى فضول جوايا أعرف ندى جوا ولا لأ...بس عربيتها مش هنا يبقى هى مش جوا...
مروة:"شكرا على توصيلى...وكمان شكرا أنك رجعتلى الموبايل"
رديت بإبتسامة:"العفو..أنا معملتش حاجة,بتمنى نشوف بعض تانى قريب"
مروة:"أكيد...أنيووووو"
دخلت البيت و أنا ركبت العربية و مشيت...كنت بفكر طول السكة فى كل اللى حصل النهاردة...كنت بحاول أفهم حاجة.....
لما ندى كانت بتكلم نفسها الصبح..كانت بتتكلم عن مين؟؟؟يا ترى عن دونجهى و ديما؟!!لو كدة يبقى مفيش داعى انى اغير من
دونجهى....بس موقف ندى أنا مش فهمه...يعنى هى مش معجبة بيا حتى؟؟نفسى أعرف ليه بتعمل كدة!!!
كانت راسى هتنفجر من كتر التفكير..أعتقد اننا لازم نتكلم قريب فى الموضوع ده عشان أفهم كل حاجة....فضلت ألف شوية
بالعربية,مكنتش عايز أرجع البيت,روحت night club كنت متعود أروح عليه...مع أن الوقت لسة بدرى على أنى أشرب..بس مقدرتش
أمسك نفسى...قعدت شوية و أنا كل اللى بيدور فى راسى هو ندى......وبعد شوية قومت و روحت على البيت...كانوا هم التلاتة واقفين
فى المطبخ..و واضح انهم مبسوطين و بيقضوا وقت ممتع مع بعض...كنت شربت كاس واحد...دخلت على أوضتى على طول و نمت
على السرير..كان الوقت لسة بدرى على النوم بس مكنش عندي طاقة انى أشوفها بتعامل دونجهى بطريقة و أنا بتتجاهلنى تماما.....
وفاجأة قومت وقفت و فتحت باب الأوضة و روحت على المطبخ......
"ندى...ممكن نتكلم شوية؟!!"
مبصتش فى وشى حتى.....
ندى:"بيانيه...ممكن مش دلوقتى؟؟أنا بعمل حاجات"
مقدرتش أستحمل أكتر مسكت أيدها و خرجتها برا المطبخ....
"بس أنا عايز نتكلم دلوقتى"
مسيبتش أيدها..فتحت باب الشقة و ركبنا الأسانسير لغاية السطح...
ندى:"شيوووون...أنت بتوجعنى,سيب أيدى"
سيبت أيدها و وقفت أدامها......
"بتعملى معايا كدة ليه؟!!!على الأقل فهمينى"
ندى:"وأنا عملت معاك أيه؟؟"
"بلاش الطريقة ديه...من ساعت اللى حصل فى الحفلة و أنتى متغيرة
معايا..أنا عارف ان اللى حصل........"
ندى:"انسى الموضوع ده و متتكلمش فيه تانى..وبعدين انت مدى الموضوع
أكبر من حجمه,اللى حصل ده عادى و بيحصل مع بنات تانية....صح؟!!"
استغربت من كلامها:"تقصدى أيه؟؟؟"
ندى:"أقصد أن أحنا كدة كويس...واهتمامك ده خليه ليونا أو مروة"
قالت الجملة ديه و سابتنى و نزلت...كنت مصدوم تماما,أزاى تفكر فيا بالطريقة ديه؟؟؟
بس كلامها ده يعنى......أنها.....بتغير؟!!!!!!!!
لمجرد انى فكرت فى الفكرة ديه أرتسمت أبتسامة لا إرادية على شفايفى...بس بردوا مش عارف هصلح الموقف ده أزاى....
***********************************
حاسس بحاجات غريبة بتحصل حوليا و مش فاهم أى حاجة...أيه اللى يخلى شيون يعامل ندى بالطريقة ديه و يسحبها لبرا؟؟؟كنت
عايز أوقفه بس معرفش ليه ديما مسكت أيدى و وقفتنا...واحساسى بإن بنهم حاجة رجعلى تانى......
دونجهى:"ليه مخلتنيش أمنعه يعاملها بالطريقة ديه؟؟؟؟"
ديما:"هم متخانقين..وأعتقد من الأفضل أنهم يتكلموا عشان يحلوا الخلاف ده
بسرعة"
"وهم أتخانقوا ليه؟!!"
مش عارفة ليه انها بتحاول تخبى عليا....
ديما:"أنا معرفش تفاصيل...بس ممكن يكون خلاف فى الشغل"
كملنا اللى أحنا بنعمله...كان فاضل حاجة بسيطة و نخلص...وبعد عشر دقايق لقينا ندى نازلة تانى...ومنغير ما تتكلم كلمة واحدة دخلت
أوضتها و قفلت على نفسها...وبعدها بشوية شيون نزل و هو كمان دخل أوضته....فى حاجة غريبة بينهم,مش مرتاح للموضوع ده....
ديما:"أنا هدخل أشوف مالها"
و دخلت ديما ورا ندى و إنا كملت اللى كنا بنعمله...حطيت الكيمباب فى العلب...وبعده حسيت بالفضول...فضلت انى أشوف شيون
الأول...خبطت على الباب....
شيون:"أدخل"
فتحت الباب و فضلت واقف....
"أيه اللى حصل؟!!"
شيون:"مفيش حاجة...انا نفسى مش فاهم و حاسس انى متلخبط"
"يعنى أيه اللى حصل عشان تعاملك بالطريقة ديه؟!!!"
شيون:"سوء فهم بسيط..أنا عايز أنام"
خرجت و قفلت الباب....معنى كلامه ان مفيش حاجة بينهم؟؟؟؟
روحت عند أوضة ندة و خبط الباب.....
ديما فتحت الباب....
"أنا خلصت..أنتوا هتفضلوا هنا بقيت اليوم ولا أيه؟!!"
ندى:"أنياااا..أحنا خارجين أهوه"
خلصنا الحاجات و وضبنا الشنط لتانى يوم و ديما روحت على بيتها وأتفقنا اننا هنعدى عليها تانى يوم الصبح......
خلص اليوم من غير أى حاجة تحصل تانى...شيون مخرجش من أوضته بقيت اليوم و ندى قعدت شوية تتفرج على التليفزيون و بعدين
دخلت تنام....كنت حاسس بالغيرة,حتى لو كانوا متخانقين بس أيه اللى يخليهم زعلانين من بعض للدرجادى؟!!
وبعد تفكير طويل دخلت أنام........
صحيت الساعة 9 الصبح...خرجت من الأوضة وشوفت ندى و شيون قاعدين بيتفرجوا على التليفزيون و ندى بتشرب قهوة...
معنى كدة انهم اتصالحوا؟؟؟؟
"صباح الخير"
ندى:"صباح الخير أوبا"
شيون:"صباح الخير"
ندى:"يلا أغسل وشك و ألبس بسرعة مش عايزين نتأخر...عايزين نلحق
اليوم من أوله"
"أوووووه...أراسووو..وأنتى كمان كملى لبسك"
دخلت أخدت دوش ولبست هدومى...كانت ندى كمان جهزت,أخدنا الشنط و نزلنا...و عدينا على ديما عشان نروح الملاهى مع بعض
***********************************
أستنيتهم لغاية ما وصلوا و بعدها روحنا على الملاهى.....
أول ما دخلنا ندى بدأت تتنطط زى الطفل الصغير...قعدنا نلعب كتير و نلف كتير...وأكلنا الأكل اللى عملناه...وندى طول ما أحنا
ماشيين بتاكل فى الحلويات بتاعتها....اااااااشش أد أيه أنا بتعذب...
بس كنت مبسوطة أوى معاهم....وقفنا عند قطر الموت...
دونجهى:"يلا نركب ده"
ندى:"هاااااا؟؟؟لأ شكرا أركبوه أنتوا"
دونجهى:"ليه؟؟خايفة؟!!"
ندى:"اه....أنا مش بركب الحاجات ديه"
"خلينا احنا نركبها يا أوبا...ندى مش هتغير رأيها..هى بتخاف من اللعب
ديه"
دونجهى:"أراسووو..يلا بينا"
مسك أيدى و جرينا على القطر...كنت حاسة ان قلبى هيخرج من مكانه بسبب فرحتى...أد أيه بقينا قريبين من بعض..لمجرد أنى أكون
جنبه ده بيحسسنى بأنى مبسوطة و بنسى كل حاجة عيشتها قبل كدة......
قعدنا جنب بعض...كان لسة ماسك أيدى...وأول ما أبتدت اللعبة شديت على أيده جامد...كنا بنصوت بصوت عالى أوى.....
وأخيرا بعد ما خلصنا نزلنا و كانت ندى مستنيانا و فى أيديها قطعة شيكولاتة.....
"أرحميييييينى"
ندى:"وأنا عملت أيه؟!!!"
"هاتى حتة"
ندى:"لأ أنتى المفروض متاكليش الحاجات ديه عشان تحافظى على رشاقتك"
"ملكيش دعوة برشاقتى و هاتى حتة"
دونجهى:"خلاص بطلوا خناق...ندى أديها حتة"
ندى:"لأ...ديه بتاعتى"
دونجهى:"طب مش هتدينى أنا حتة؟!!!"
ندى:"لأ بردوا"
وفى لحظة كان دونجهى أخد الشنطة كلها منها و أدانى الشيكولاتة اللى أنا عايزاها......
ندى:"عااااااااا....رجعولى حلويااااااااتى"
دونجهى:"بس...هتفضحينا"
"هههههههههه...قولتلك هاتى حتة بالزوق"
رجعنا لندى الشنطة بتاعتها بعد ما أخدت الشيكولاتة اللى إنا عايزاها عشان تبطل زن...و قعدنا نضحك على منظرها الطفولى
بعدها....بجد ده احلى يوم فى حياتى..أنى أكون مع الناس اللى بحبها و بنعمل مع بعض الحاجات اللى أحنا بنحبها...بنهزر مع بعض و
بنتكلم مع بعض و بنضحك مع بعض....كل حاجة كانت رائعة بالنسبالى........
لعبنا كل اللعب اللى موجودة و تعبنا جدا....وفى اخر اليوم روحت على البيت و ندى و دونجهى روحوا على بيتهم....
دخلت أوضتى و غيرت هدومى و نمت على طول...مكنش عندي أى طاقة أنى أعمل أى حاجة غير النوم...حطيت راسى على المخدة و
قعدت أفتكر كل لحظة قضيتها معاهم...وكان صورة دونجهى متعلقة فى خيالى...وأخيرا روحت فى النوم و أنا على وشى
إبتسامة...بقالى كتير محستش بالراحة ديه..أن حواليا ناس بيهتموا بيا و بيحبونى......
****************************************
كان يوم توحفة...بجد بقالى كتير جدا مطلعتش مشوار زى ده..أفتكرت لما كنت بخرج مع ماما و بابا و ريم و بنروح الملاهى و ماما
كانت بتعمللنا الساندويتشات اللى هنتغدا بيها هناك.....
وعشان كدة كنت عايزة أحس الاحساس ده تانى...أننا نعمل اكل بأيدينا و نروح فسحة زى ديه......
دخلنا البيت..كان شيون قاعد على الكنبة و ماسك موبايله....وأنا دخلت أنام بسرعة عشان أعرف أصحى بدرى عشان أجيب ريم من
المطار....
"تصبحوا على خير..أنا هدخل أنام"
شيون و دونجهى:"و انتى من اهله"
غيرت هدومى و أخدت شاور ونمت على السرير..قعدت أفكر شوية قبل ما انام.....
ماشى يا شيون..أنا بقى هوريك الفرق بين ندى و بقيت البنات اللى أنت تعرفهم...معرفش ليه الفكرة ديه جت على بالى..بس عجبتنى..
روحت فى النوم مع الافكار ديه و محستش بأى حاجة بعدها...
الا بصوت المنبه جنبى...قومت بسرعة و غيرت هدومى و روحت على المطار....
كنا بنتواصل على التليفون عشان أعرف مكانها فين....و أخيرا وصلت.....شاورتلها عشان تشوفنى.....
كانت وحشانى أوى.....أول ما قربت منى حضنا بعض...
ريم:"أختى حبيبتى"
"وحشتينى أوى...عاملة أيه؟؟؟"
ريم:"تمام جدا...يلا أحنا هنفضل واقفين هنا كتير؟؟؟؟"
ركبنا العربية...معرفش العربية كفت شنطها أزاى...بصراحة الشنط دخلت بأعجوبة مع انهم كانوا شنطتين بس كانوا كبار بطريقة
غريبة.....
كنا بنتكلم طول السكة على اللى عملته فى انجلترا و دراستها و أخر الاخبار بالنسبالنا أحنا الاتنين...
وصلنا و وقفنا تحت العمارة...
"الدور ال12..أسبقينى أنتى و أنا هشوف هطلع الشنط ديه أزاى و أحصلك"
ريم:"OK"
***************************************
معرفتش أنام من أمبارح..مزاجى مكنش رايق و كل ما أفكر فى المشكلة اللى بينا مزاجى يتعكر زيادة....
و فاجأة لقيت الباب بيخبط فى نفس الوقت اللى دونجهى صحى فيه.....
دونجهى:"مين اللى جايلنا دلوقتى؟!!!"
"هفتح ونشوف"
فتحت الباب...كانت بنت شكلها مش كورى.....و طولها متوسط...
بصيتلى من فوق لتحت و دخلت من غير ولا كلمة.....
صدمتى من الموقف خلتنى مش عارف أقول أيه....
بصيت ورايا...لقيتهدادهلت و قعدت على الكنبة و حطت رجل على رجل.....
دونجهى:"مين حضرتك؟؟؟"
وقفت جنب دونجهى قدامها و على وشنا اسئلة كتير..أزاى تدخل بالطريقة ديه....
بصتلنا احنا الاتنين من أعلى راسنا لأخمص قدمنا و بعدها اتكلمت
.....:"دونجهى و شيون...صح؟؟؟؟؟"
...
...
....يتبع.....
عارفة انه ممكن يكون قصير شوية و ممل بس فى النهاية بتمنى تقولولى رأيكوا...وأيه أكتر حتة عجبتكوا و أكتر حتة معجبتكوش...وطبعا توقعاتكوا للبارت الجاى...
ليست هناك تعليقات:
إرسال تعليق